site
stats
پاکستان

تحریک انصاف کا سندھ میں ضمنی الیکشن میں حصہ لینے کا فیصلہ

کراچی: تحریک انصاف کے چیئرمین عمران خان کا کہنا ہے کہ اگر نیب کو ٹھیک کرلیا جائے تو سارا کرپٹ ٹولہ پکڑا جائے گا۔ انہوں نے سندھ میں ضمنی الیکشن میں حصہ لینے کا اعلان بھی کیا۔

تفصیلات کے مطابق تحریک انصاف کے چیئرمین عمران خان 3 روزہ دورے پر کراچی میں موجود ہیں۔ اپنے دورے کے دوسرے روز آج انہوں نے انصاف ہاؤس میں پارٹی قیادت سے میٹنگ کی اور آئندہ ہونے والے انتخابات اور تنظیمی سرگرمیوں کا جائزہ لیا۔

عمران خان نے کارکنان کو رابطہ مہم تیز کرنے کی ہدایت کی۔ انہوں نے مقامی قیادت کو انتخابات کی تیاریاں ابھی سے کرنے کی بھی ہدایت جاری کی۔

عمران خان کا کہنا تھا کہ انتخابات میں کھڑے ہونے والے امیدواروں کو مختلف علاقوں کے دورے پر بھیجا جائے تاکہ لوگوں سے ان کا تعارف ہوسکے۔

میڈیا سے گفتگو کرتے ہوئے عمران خان کا کہنا تھا کہ اگر نیب کو ٹھیک کرلیا جائے تو سارا کرپٹ ٹولہ پکڑا جائے گا۔ کرپشن کے بڑے مگر مچھوں کو بچایا جارہا ہے۔

انہوں نے کہا کہ نواز شریف صرف اپنی پاناما کی کرپشن نہیں چھپا رہے بلکہ اپنے ساتھ پورے کرپٹ ٹولے کو بچا رہے ہیں۔

عمران خان نے سندھ میں ضمنی الیکشن میں حصہ لینے کا اعلان بھی کیا۔ ان کا کہنا تھا کہ تحریک انصاف لاڑکانہ اور نواب شاہ سے ضمنی الیکشن لڑے گی۔

اس موقع پر وہ کراچی کی گندگی پر بھی تبصرہ کرنا نہیں بھولے۔ ان کا کہنا تھا کہ کراچی جیسا شہر گندگی میں ڈوب رہا ہے، چوری شدہ پیسہ واپس آجائے تو اسے شہروں کی ترقی و صفائی پر خرچ کیا جائے گا۔

عمران خان آج کورنگی میں تحریک انصاف کی رکن سازی کے حوالے سے ہونے والے جلسہ میں شرکت کریں گے جہاں ممبر سازی کا افتتاح کیا جائے گا۔ اس کے بعد وہ کشمیر روڈ پر کنونشن سے بھی خطاب کریں گے۔

اس سے قبل کل عمران خان نے کراچی میں شوکت خانم کینسر اسپتال کا سنگ بنیاد بھی رکھا تھا۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top