اسلام آباد: پاکستان تحریک انصاف کے چیئرمین عمران خان نے کہا ہے کہ جنرل (ر) باجوہ نے ان پر بھارت سے دوستی کے لیے دباؤ ڈالا۔
تفصیلات کے مطابق سابق وزیر اعظم پاکستان عمران خان سے صحافیوں کے ایک وفد نے آج ملاقات کی، صحافیوں سے گفتگو کرتے ہوئے انھوں نے کہا کہ باجوہ بھارت سے دوستی چاہتا تھا اس کے لیے مجھ پر دباؤ بھی ڈالا گیا۔
پی ٹی آئی چیئرمین نے کہا باجوہ ایک روز کچھ کہتا ہے اور دوسرے روز اس بات سے مکر جاتا ہے، ان کے خلاف احتساب فوج کے اندر سے ہونا چاہیے۔
عمران خان نے کہا کہ میرے گھر پر میری غیر موجودگی میں جو حملہ کیا گیا اس کا کوئی جواز نہیں تھا، گھر کے حملے کے حوالے سے کیس تیار کر لیا ہے، جلد ہی فائل کر دیا جائے گا۔
انھوں نے کہا عارف علوی اب اسٹیبلشمنٹ اور ہمارے درمیان کسی بھی قسم کا کردار ادا نہیں کر رہے، شاہ محمود قریشی اور پرویز الہٰی کو دیگر جماعتوں سے رابطے بحال کرنے کا ٹاسک دیا ہوا ہے۔
عمران خان کا کہنا تھا کہ کس قانون کے تحت یہ لوگ توڑی گئی پنجاب اور کے پی کے اسمبلیاں بحال کریں گے، سپریم کورٹ نے پہلے سوموٹو کے ذریعے اسمبلیاں بحال کیں تو سوموٹو ٹھیک تھا، اب سوموٹو کے ذریعے الیکشن چاہ رہا ہے تو یہ لوگ سوموٹو کے پیچھے پڑ گئے۔
انھوں نے کہا 90 روز میں الیکشن نہیں کروائے گئے تو ہم سڑکوں پر نکلیں گے، نگراں حکومت کو نیوٹرل کا کردار ادا کرنا چاہیے تھا جو وہ ادا نہیں کر رہی، محسن نقوی، آئی جی پنجاب، سی سی پی او لاہور جرائم پیشہ افراد ہیں، میڈیا پر ہمارا مکمل بلیک آؤٹ کیا گیا ہے، سوشل میڈیا کو بھی کنٹرول کرنے کی کوشش کر رہے ہیں۔
