اسلام آباد: چیئرمین پی ٹی آئی عمران خان کے خلاف دائر مقدمات پر بنائی گئی جے آئی ٹی کا نوٹیفکیشن جاری کردیا گیا ہے۔
جاری نوٹی فیکیشن کے مطابق جے آئی ٹی انسداد دہشت گردی ایکٹ کے تحت بنائی گئی ہے جو عمران خان پر اسلام آباد میں درج چار مقدمات کی تفتیش کرے گی۔
نوٹی فیکیشن کے مطابق جے آئی ٹی پانچ افسران پر مشتمل ہوگی، جے آئی ٹی کی سربراہی ایڈیشنل آئی جی پنجاب ذوالفقار حمید کریں گے جبکہ وفاقی پولیس کے ڈی آئی جی اویس احمد جے آئی ٹی میں شامل ہوں گے۔
اسکے علاوہ مشترکہ تحقیقاتی ٹیم میں آئی ایس آئی، ایم آئی اور آئی بی کے افسران بھی شامل ہونگے۔
واضح رہے کہ دو روز قبل وفاقی حکومت نے دہشت گردی سے متعلق مقدمات کی تحقیقات کے لئے اعلی سطحی جے آئی ٹی تشکیل دینے کا فیصلہ کیا تھا۔
یہ بھی پڑھیں: حکومت کا عمران خان کے خلاف دہشت گردی کے مقدمات پر اعلیٰ سطحی جے آئی ٹی بنانے کا فیصلہ
جے آئی ٹی کا اقدام گزشتہ روز اتحادی جماعتوں کے اجلاس کے فیصلے کی روشنی میں کیا گیا، جے آئی ٹی چیئرمین پی ٹی آئی عمران خان اور ان کی پارٹی کے کارکنوں پر درج مقدمات کی انکوائری کرے گی۔
جے آئی ٹی جوڈیشل کمپلیکس اسلام آباد میں پولیس پر تشدد کی تحقیقات کرے گی اور ریاستی اداروں کے خلاف عوام کو اکسانے، تشدد پر بھڑکانے کے ذمہ داروں کو تعین کرے گی۔
