اسلام آباد : وزیر اعظم عمران خان نے کہا ہے کہ ترکی نے مقبوضہ کشمیر کے معاملہ پر او آئی سی رابطہ گروپ میں فعال کردار ادا کیا ہے، وزیراعظم نے ترکی کی مستقل حمایت پرشکریہ ادا کیا۔
تفصیلات کے مطابق وزیر اعظم عمران خان کی ترک صدر رجب طیب اردوان سے ملاقات کااعلامیہ جاری کردیا گیا، اعلامیہ میں کہا گیا ہے کہ وزیراعظم اور ترک صدرکی ملاقات عالمی پناہ گزین کانفرنس کی سائیڈ لائن پرہوئی۔
دونوں رہنماؤں نے خطے کی مجموعی صورتحال اورعلاقائی امور پر گفتگو کی، اس کے علاوہ دونوں رہنماؤں کے درمیان آئندہ سال ہونے والی اسٹریٹجک کونسل اجلاس پر بھی بات چیت کی گئی گئی۔
اعلامیہ کے مطابق دونوں رہنماؤں نے اہم علاقائی اور عالمی امور پر بھی تبادلہ خیال کیا،اس موقع پر وزیر اعظم عمران خان نے مقبوضہ کشمیر کے معاملہ پر ترکی کی مستقل حمایت پر شکریہ ادا کیا اور کہا کہ ترکی نے مقبوضہ کشمیر کے معاملہ پر او آئی سی رابطہ گروپ میں فعال کردارادا کیا ہے۔
اعلامیہ میں مزید کہا گیا ہے کہ وزیراعظم عمران خان نے پناہ گزینوں کی سب سے بڑی آبادی کی میزبانی پر ترکی حکومت کے اقدامات کو سراہا۔
