وفاقی وزیر برائے ترقی و منصوبہ بندی احسن اقبال نے کہا ہے کہ عمران خان نے9مئی کے بعد خود کو مائنس کرنے کی سازش تیارکرلی۔
اسلام آباد میں میڈیا سے گفتگو کرتے ہوئے انہوں نے کہا کہ ہمیں عمران خان کو مائنس کرنے کی ضرورت نہیں ہے، یہ کام انہوں نے خود ہی کرلیا ہے۔
احسن اقبال کا کہنا تھا کہ عمران خان نے دونوں اسمبلیاں الیکشن کرانے کیلئے نہیں بلکہ ملک پر بم گرانے کیلئے توڑی تھیں۔
انہوں نے کہا کہ وہ شخص جس کی ٹانگ کا پلستر نہیں اترتا تھا ایک دن نیب کی نگرانی میں رہا اور سب ٹھیک ہوگیا، اس کا مطلب ہے کہ شوکت خانم سے اچھا علاج نیب کے پاس ہے۔
وفاقی وزیر نے کہا کہ عمران خان نے کہا تھا کہ کشمیر کا مسئلہ حل ہوجائے تو پاکستان کا ایٹمی پروگرام بند کردینگے، عمران خان یہ بات یاد رکھیں کہ ایٹمی پروگرام پر جو بھی میلی نگاہ ڈالے گا یہ قوم اس کو کچل کر رکھ دے گی، پاکستانی قوم اپنی سلامتی سے کسی کو کھیلنے کی اجازت نہیں دیتی۔
