پاکستان تحریک انصاف (پی ٹی آئی) کے چیئرمین عمران خان کا کہنا ہے کہ وزیراعلیٰ پنجاب پرویز الٰہی چاہتے ہیں اسمبلی تحلیل کا معاملہ تھوڑا آگے لے جائیں گے لیکن انہوں نے اختیار مجھے ہی دیا ہے۔
اے آر وائی نیوز کے مطابق سابق وزیراعظم عمران خان نے نجی ٹی وی سے گفتگو کرتے ہوئے کہا کہ اسمبلیاں دسمبر میں ہی تحلیل کریں گے پرویز الٰہی اسمبلی کی تحلیل کا معاملہ آگے لے جانا چاہتے ہیں لیکن فیصلے کا اختیار مجھے دیا گیا ہے۔
انہوں نے کہا کہ سابق آرمی چیف جنرل باجوہ نے کہا تھا عثمان بزدار کو ہٹاؤ علیم خان کو وزیراعلیٰ بناؤ لیکن جب علیم خان کو وزیراعلیٰ بنانے لگے تو پرویز الٰہی نے کہا سپورٹ نہیں کروں گا پھر ہم نے فیصلہ کیا پرویز الٰہی کو سپورٹ کریں گے۔
ایک سوال کے جواب میں عمران خان نے کہا کہ این آر او ون جنرل مشرف اور این آر او ٹو جنرل باجوہ نے دیا ہے۔
یہ پڑھیں: جنرل باجوہ نے عثمان بزدار کو ہٹا کر علیم خان کو وزیر اعلیٰ بنانے کا کہا تھا، عمران خان
عمران خان کا کہنا تھا کہ نواز شریف کی پوری کوشش ہے کہ مجھے نااہل کروایا جائے یہ اگر واپس آئے تو پنجاب حکومت انہیں بالکل گرفتار کرے گی۔
سابق وزیراعظم نے کہا کہ ’کچھ لوگوں کے لیے کرپشن کوئی چیز نہیں تھی شہباز شریف کو بڑا عقل مند سمجھا جاتا تھا یہ لوگ تو اپنے کیسز معاف کروانے میں لگے ہیں انہیں ملک کی کوئی فکر نہیں۔‘
انہوں نے کہا کہ ’سارے سروے اٹھا کر دیکھ لیں پی ٹی آئی کا گراف اوپر جارہا ہے میں الیکشن کا مطالبہ اس کے لیے کررہا ہوں کہ مجھے ملک کی فکر ہے۔‘
