کراچی: پاکستان تحریک انصاف کے چیئرمین عمران خان نے صوبائی قیادت کو عام انتخابات میں تگڑے امیدوار چننے کی ہدایت کر دی ہے۔
تفصیلات کے مطابق ذرائع نے بتایا ہے کہ سندھ اسمبلی کی 130 اور قومی اسمبلی کی 60 نشستوں کے لیے پی ٹی آئی قیادت کی جانب سے درخواستیں اگلے ماہ سے طلب کی جائیں گی۔
ذرائع کا کہنا ہے کہ امیدواروں کے جلد انتخاب کا فیصلہ بھرپور تیاری کے لیے کیا گیا ہے، اور چیئرمین نے ہدایت کی ہے کہ تگڑے امیدواروں کا انتخاب کیا جائے۔
اس سلسلے میں علی زیدی کی قیادت میں 7 رکنی بورڈ امیدواروں کا فیصلہ کرے گا، اور شارٹ لسٹ کیے گئے حتمی امیدواروں کے نام کا اعلان مرکز سے کیا جائے گا۔
سندھ حقوق مارچ کے طرز پر جلد لانگ مارچ کا اعلان بھی کیا جائے گا اور عوامی رابطہ مہم میں تیزی لائی جائے گی، یاد رہے کہ عمران خان اپنی تقاریر میں متعدد مرتبہ سندھ میں اگلا انتخاب جیتنے کا دعویٰ کر چکے ہیں۔
