اسلام آباد: وزیراعظم عمران خان نے ایک بار پھر اپوزیشن کو واضح کیا ہے کہ این آر او کسی صورت نہیں دیا جائے گا۔
لاہور میں واقع مینار پاکستان پر ہونے والے اپوزیشن کے جلسے کے بعد وزیراعظم عمران خان نے سماجی رابطے کی ویب سائٹ ٹویٹر پر اپنا پیغام جاری کیا۔
عمران خان کا کہنا تھا کہ ’پاکستان ڈیموکریٹک موؤمنٹ (پی ڈی ایم) بلیک میل کرنےکیلئےجو بھی منصوبہ بنائےمیرا جواب دو ٹوک ہے، جس کو ایک بار پھر واضح کر رہا ہوں کہ کبھی این آراونہیں دوں گا‘۔
اُن کا کہنا تھا کہ ’لٹیرےجوچاہیں کریں میری حکومت سے انہیں این آراو نہیں ملےگا‘۔
وزیراعظم عمران خان نے کہا کہ ’کرونا وبا کی لہر میں پی ڈی ایم پیسہ، وقت اور قوت ضائع کررہی ہے، اپوزیشن جماعتیں جلسے کر کے عوام کی زندگی کو خطرے میں ڈال رہی ہیں‘۔
مزید پڑھیں: جنوری کے آخر یا فروری میں اسلام آباد کی طرف مارچ ہوگا، فضل الرحمان
عمران خان نے کہا کہ ’پی ڈی ایم والوں کوعوام کی بہبود اور حفاظت کی کوئی پرواہ نہیں، اُن کا مقصدبلیک میل کرکے این آر او اور لوٹی دولت کو بچاناہے‘۔
Let me once again reiterate: I will never give an NRO. Whatever future plans of further blackmail PDM may have, my message is categorical: There will never be an NRO from my govt no matter what tactics the looters devise.
— Imran Khan (@ImranKhanPTI) December 13, 2020
واضح رہے کہ آج اپوزیشن کی گیارہ جماعتوں کے اتحاد سے بننے والے گرینڈ الائنس پی ڈی ایم نے لاہور کے مینار پاکستان پر جلسے کا انعقاد کیا، مولانا فضل الرحمان اور بلاول بھٹو نے جنوری میں اسلام آباد مارچ کرنے اور استعفے دینے کا اعلان بھی کیا۔