لاہور :لاہورہائیکورٹ میں حفاظتی ضمانت کے لئے عمران خان آج بھی عدالت میں پیش نہیں ہوپائیں گے ، ڈاکٹرز کی ہدایت کے مطابق عمران خان کیلئے فی الحال چلنا خطرناک ہے۔
تفصیلات کے مطابق سابق وزیراعظم عمران خان کی حفاظتی ضمانت پر سماعت کے معاملے پرذرائع پی ٹی آئی کا کہنا ہے کہ عمران خان آج بھی عدالت میں پیش نہیں ہوپائیں گے ، ڈاکٹرزکی ہدایت کےمطابق عمران خان کیلئےفی الحال چلناخطرناک ہے۔
لاہورہائیکورٹ میں آج دوبارہ عمران خان کی حفاظتی ضمانت کی درخواست پرسماعت ہوگی، ہائی کورٹ نے حفاظتی ضمانت کیلئے عمران خان کو آج پیش ہونے کا حکم دیا ہے۔
گزشتہ روز سماعت میں عمران خان کےوکیل نے کہا تھا کہ صحت کے مسائل کی وجہ سے عمران خان عدالت نہیں آپا رہے ، جس پر عدالت نے ریمارکس دیے تھے کہ آپ عمران خان کواسٹریچرپر لے کرآجائیں یا بیان حلفی دیں کہ صبح عمران خان کو لے آئیں گے۔
وکیل نے جواب دیا تھا کہ ہم یہ بیان حلفی نہیں دے سکتے، ویڈیولنک کے ذریعے پیشی کرواسکتے ہیں۔
یاد رہے چیئرمین تحریک انصاف عمران خان نے عبوری ضمانت خارج ہونے کے بعد حفاظتی ضمانت کے لئے لاہورہائیکورٹ میں درخواست کی تھی ، جس میں کہا تھا کہ خدشہ ہے پولیس گرفتارکرلے گی، حفاظتی ضمانت منظورکی جائے۔