اسلام آباد: وزارت داخلہ کا کہنا ہے کہ ملک میں دو سال میں دہشت گردی کے 1560 واقعات ہوئے، جس میں قانون نافذ کرنے والے 593 اور 263 شہری شہید ہوئے۔
تفصیلات کے مطابق سینیٹ میں وزارت داخلہ نے مئی 2022 سے اگست 2023 تک ملک میں دہشت گردی واقعات کی تفصیلات پیش کیں۔
رپورٹ میں بتایا گیا کہ ملک میں دو سال میں دہشت گردی کے 1560 واقعات ہوئے اور دہشت گردی واقعات میں قانون نافذ کرنے والے 593 اور 263 شہری شہید جبکہ 1365 سیکیورٹی فورسز اور 773 دیگر زخمی ہوئے۔
رپورٹ میں کہا گیا کہ سال 2022 میں دہشت گردی کے 736 واقعات ہوئے اور واقعات میں227 سیکیورٹی فورسز اور 97 دیگر شہید جبکہ 520 سیکیورٹی فورسز اور 401 دیگر افراد زخمی ہوئے۔
وزارت داخلہ کا کہنا تھا کہ یکم اگست 2023 میں ملک میں دہشت گردی کے 824 واقعات ہوئے، جس میں 366 سیکیورٹی فورسز اور166 دیگر افراد شہید ہوئے جبکہ 845سیکیورٹی فورسز اور 372دیگر افراد زخمی ہوئے۔
