مہاراشٹر: بھارتی ریاست مہاراشٹر کے ایک سرکاری اسپتال میں 24 گھنٹوں میں 24 افراد کی موت نے ریاست میں ہلچل مچا دی، اموات کا سلسلہ جاری رہا اور اب تک 48 گھنٹوں میں 31 افراد موت کا شکار ہو چکے ہیں۔
بھارتی میڈیا رپورٹس کے مطابق مہاراشٹر کے ناندیڑ کے ایک سرکاری اسپتال شنکر راؤ چون میں دو دنوں میں اکتیس اموات پر راہول گاندھی، شرد پوار سمیت اپوزیشن رہنماؤں نے ریاست کے وزیر اعلیٰ ایکناتھ شندے کی سرکار پر تنقید کی ہے، اور واقعے کو قتل قرار دے دیا۔
اسپتال میں پہلے دن چوبیس افراد موت کا شکار ہوئے تھے جن میں 12 شیر خوار بچے بھی شامل تھے، اور گزشتہ رات 4 مزید بچوں سمیت 7 مریضوں کی موت ہو گئی، شیرخوار بچوں کی مجموعی اموات 16 ہو گئی ہیں۔
کانگریس پارٹی نے اس معاملے کی مکمل تحقیقات کا مطالبہ کر دیا ہے، واقعے کی تحقیقات کے لیے تین رکنی ماہرین کی کمیٹی تشکیل دی گئی ہے۔ نیشنلسٹ کانگریس پارٹی کے شرد پوار نے سوشل میڈیا X پر افسوس ناک واقعے کو چونکا دینے والا قرار دیا۔ اپوزیشن کے بیانات کے مطابق بچوں کی اموات اسپتال میں ادویات کی عدم موجودگی کے باعث واقع ہوئیں۔
واضح رہے کہ 2 ماہ قبل بھی تھانے میونسپل کارپوریشن کے کلوا اسپتال میں ایک ہی رات میں 18 لوگوں کی موت ہو گئی تھی، شردپوار نے کہا کہ اگر اس واقعے کو سنجیدگی سے لیا جاتا تو یہ واقعہ نہ ہوتا۔
میڈیا رپورٹس کے مطابق مذکورہ اسپتال میں 500 بستر ہیں لیکن اس میں تقریباً 1200 مریض داخل ہیں، اسپتال میں کچھ نرسوں کے تبادلے کے بعد پوسٹیں خالی ہیں، اور میڈیکل آفیسرز کی بھی کمی ہے۔
