حیدرآباد : بھارت میں ایک نوجوان لڑکا لڑکی کو سرعام موٹر سائیکل پر زبردستی اٹھا کر لے گیا، لڑکی کے اغواء کی رپورٹ پر پولیس کی دوڑیں لگ گئیں، حقیقت سامنے آنے پر شرمندگی کا سامنا کرنا پڑا۔
تفصیلات کے مطابق بھارتی شہر حیدرآباد کے بنجارا ہلز کے علاقہ میں گزشتہ روز ایک نوجوان لڑکی کے اغواء کی اطلاع سے سنسنی پھیل گئی۔
بھارتی ٓمیڈیا کا کہنا ہے کہ علاقہ کے مقامی افراد نے سڑک پر ایک نوجوان کی جانب سے لڑکی کو زبردستی اپنی بائیک پر بٹھانے کا منظر دیکھا اور فوری طور پر پولیس کو لڑکی کے اغواء کی واردات کی اطلاع دی۔
اطلاع ملتے ہی علاقہ پولیس کی دوڑیں لگ گئیں اور فوری کارروائی کرتے ہوئے اس جوڑے کا پتہ چلایا۔ تاہم بعد ازاں پولیس کو معلوم ہوا کہ یہ دونوں آپس میں دوست ہیں۔
پولیس کے مطابق ان دونوں لڑکا لڑکی میں ہونے والے معمولی جھگڑے کے بعد نوجوان نے اپنی دوست کو اغوا نہیں کیا بلکہ اس کو زبردستی اپنی بائیک پر بٹھا کر لے گیا تھا۔
اس منظر کو دیکھنے والے مقامی افراد نے اس کو اغوا کا واقعہ سمجھا اور اس کی اطلاع فوری طور پر پولیس کو دی۔ پولیس نے معاملہ سلجھانے کی خاطر اس جوڑے کی بعد ازاں کونسلنگ کی۔
