نئی دہلی : بھارت میں گرمی کا 146 سالہ ریکارڈ ٹوٹ گیا ، 1877 کے بعد فروری کا مہینہ سب سے زیادہ گرم رہا۔
تفصیلات کے مطابق بھارت میں گرمی نے ماہِ فروری میں ہی لوگوں کو جھلسا کر رکھ دیا۔
بھارت میں ماہِ فروری کی گرمی نے گزشتہ 146 سال کا ریکارڈ توڑ دیا، محکمہ موسمیات نے بتایا کہ بھارت میں انیس سو ستتر کے بعد سے اس سال کا سب سے گرم مہینہ فروری رہا ہے۔
محکمہ موسمیات کا کہنا تھا کہ فروری میں متعدد بھارتی شہروں کا اوسط زیادہ سے زیادہ درجہ حرارت بڑھ کر انتیس اعشاریہ پانچ ڈگری سلسیس ریکارڈ کیا گیا۔
ایک ورچوئل پریس کانفرنس سے خطاب کرتے ہوئے آئی ایم ڈی کے ہائیڈرومیٹ اور ایگرومیٹ ایڈوائزری سروسز کے سربراہ ایس سی بھان نے کہا کہ مارچ میں گرمی کی لہروں کا بہت کم امکان ہے، لیکن ملک کے بیشتر حصوں میں اپریل اور مئی میں انتہائی موسمی حالات کا سامنا کرنا پڑ سکتا ہے۔
بھان کا کہنا تھا کہ "پوری دنیا گلوبل وارمنگ کے دور میں گزر رہی ہے اور ہم گرمی کی بڑھتی ہوئی دنیا میں رہ رہے ہیں‘‘۔
