کلکتہ: بھارتی وزیرمملکت برائے داخلہ امور کرن رجیجو کا کہنا ہے کہ ورلڈ ٹی ٹوئنٹی میں سیکیورٹی کے حوالے سے پاکستان کو تحریری یقین دہانی نہیں کرائی جائے گی۔
بھارتی وزیرکا کہنا ہے کہ ’ تمام ٹیموں کی سیکیورٹی کے لئے بھرپورانتظامات کیے گئے ہیں۔
ان کا کہنا تھا کہ ’’ٹی ٹوئنٹی ورلڈ کپ کھیلنے آنے والی ٹیموں کی حفاظت ہماری قومی ذمہ داری ہے اور بھارتی زمین پرموجود ہرشخص کی حفاظت ہمارا فرض ہے‘‘۔
دوسری جانب مغربی بنگال کے وزیراعلیٰ مماتا بینرجی نے انٹرنیشنل کرکٹ کونسل کو یقین دہانی کرائی ہے کہ پاکستانی ٹیم کو فول پروف سیکیورٹی فراہم کی جائے گی۔
مغربی بنگال کی حکومت کی جانب سے سیکیورٹی دینے کی یقین دہانی آئی سی سی نے پاکستان کرکٹ بورڈ کو بھجوادی ہے۔
پی سی بی نے مغربی بنگال حکومت کی سیکیورٹی یقین دہانی سے پاکستانی وزارت داخلہ کو آگاہ کردیا ہے اورپاکستان کو ورلڈ ٹی ٹوئنٹی کے لئے آج کلئیرنس ملنے کا امکان ہے۔