ممبئی : بھارت نے باسمتی چاول کی برآمدات میں اضافے اور برآمد کنندگان کو آسانی فراہم کرنے کیلئے اہم فیصلہ کیا ہے۔
تفصیلات کے مطابق بھارت کی جانب سے چاول کی بیرون ملک فروخت پر پابندی عائد کیے جانے کے بعد عالمی منڈی میں چاول کی قیمتیں 15 سال کی بلند ترین سطح پر پہنچ گئی ہیں۔
غیرملکی خبر رساں ادارے کی رپورٹ کے مطابق بھارتی مل مالکان اور تاجروں کی جانب سے چاول کی بیرون ملک فروخت میں تیزی سے کمی کی شکایت کے بعد فیصلہ کیا گیا ہے کہ برآمد کنندگان کو بڑی سہولت فراہم کی جائے گی۔
رپورٹ کے مطابق متعلقہ ذرائع نے شناخت ظاہر نہ کرنے کی شرط پر رؤئٹرز کو بتایا کہ بھارتی حکومت مل مالکان اور تاجروں کو چاول کی کھیپ بھیجنے میں مدد کے لیے فلور پرائس، یا کم از کم ایکسپورٹ پرائس کو1200ڈالر سے کم کرکے 850 ڈالر فی میٹرک ٹن تک کم کر دے گی۔
واضح رہے کہ بھارت نے پچھلے سال ٹوٹا چاول کی برآمدات پر پابندی کے بعد بڑے پیمانے پر استعمال کیے جانے والے غیر باسمتی چاول کی برآمدات پر پابندی لگا کر خریدار ممالک کو حیران کردیا تھا۔
اس حوالے سے انڈین رائس ایکسپورٹرز فیڈریشن کے صدر پریم گرگ نے کہا کہ باسمتی ایم ای پی کو کم کرنے کے فیصلے سے ان کسانوں کی مدد ہوگی جو گرتی ہوئی برآمدات کی وجہ سے اپنی رقم سے محروم ہورہے تھے، اس اقدام سے ہندوستان کو باسمتی چاول کی عالمی منڈی میں اپنی نمایاں پوزیشن برقرار رکھنے میں بھی مدد ملے گی۔
گرگ نے کہا کہ چونکہ باسمتی چاول ہندوستان میں بڑے پیمانے پر استعمال نہیں کیا جاتا اور نئے سیزن کی فصل اگلے مہینے سے مارکیٹ میں آنا شروع ہو جائے گی، اس لیے ہندوستان کو مشکل صورتحال کا سامنا کرنا پڑے گا۔
یاد رہے کہ ہندوستان اور پاکستان خصوصی طور پر خوشبودار باسمتی چاول پیدا کرتے ہیں۔ ہندوستان تقریباً 40 لاکھ ٹن باسمتی چاول ایران، عراق، یمن، سعودی عرب، متحدہ عرب امارات اور امریکہ جیسے ممالک کو بھیجتا ہے۔
