آسٹریلیا سے میلبرن ٹیسٹ میں شکست کے بعد بھارتی ٹیم کے ڈریسنگ روم میں کیا ہوا اندر کی خبر باہر آئی تو سب حیران رہ گئے۔
آسٹریلیا سے میلبرن ٹیسٹ میں بدترین ناکامی کے بعد بھارتی ٹیم بالخصوص کپتان روہت شرما تنقید کی زد میں ہیں۔ اس بڑی شکست کے بعد بھارت کا آئندہ برس ورلڈ ٹیسٹ چیمپئن شپ کے فائنل کھیلنے کی خواہش کو بھی دھچکا لگا ہے اور اب ڈریسنگ روم میں تلخیوں کی نئی داستان سامنے آئی ہے۔
بھارتی میڈیا کے مطابق ڈریسنگ روم میں ماحول آئیڈیل نہیں ہے۔ سلیکٹرز، کھلاڑی اور کوچنگ اسٹاف ایک پیج پر نہیں ہیں۔ اس شکست کے بعد ہیڈ کوچ گوتم گمبھیر نے ڈریسنگ روم میں دھواں دھار تقریر کی اور کسی کا نام لیے بغیر اس ہار کے ہر ذمہ دار کو کھری کھری سنا دیں
رپورٹ کے مطابق گوتم گمبھیر نے کہا کہ نیچرل گیم کے نام پر کھلاڑی اپنی مرضی چلا رہے ہیں اور صورتحال کے مطابق نہیں کھیل رہے، لیکن اب پانی سر سے گزر چکا ہے۔
بھارتی کرکٹ ٹیم کے سابق اوپنر جنہوں نے گزشتہ سال ٹی 20 ورلڈ کپ چیمپئن بننے اور راہول ڈریوڈ کی مدت ختم ہونے کے بعد یہ منصب سنبھالا تھا نے مزید کہا کہ 6 ماہ میں کھلاڑیوں نے جس طرح ٹیم کے لیے کھیلنا چاہا انہوں نے کھیلنے دیا، لیکن بہت ہو گیا۔ اب وہ فیصلہ کریں گے کہ انہیں کیسے ٹیم کے لیے کھیلنا ہے۔
سخت سیخ پا ہیڈ کوچ نے دوٹوک الفاظ میں کھلاڑیوں کو تنبیہہ کرتے ہوئے کہا کہ بیٹرز بنگلا دیش کے خلاف سیریز سے پرفارمنس نہیں دے رہے۔ اگر کوئی کھلاڑی حکمتِ عملی کے مطابق نہیں کھیلے گا تو اس کو تھینک یو کہہ دیا جائے گا۔
واضح رہے کہ بھارت اور آسٹریلیا کے درمیان 5 ٹیسٹ میچز کی سیریز میں آسٹریلیا کو 1-2 سے نا قابل شکست برتری حاصل ہے۔ ایک ٹیسٹ میچ ڈرا ہو چکا ہے جب کہ آخری ٹیسٹ 3 جنوری سے سڈنی میں شروع ہوگا۔ بھارتی ٹیم کو واحد فتح ابتدائی ٹیسٹ میں جسپرت بمراہ کی کپتانی میں ملی تھی۔
روہت شرما کی کپتان میں رواں سیریز میں دو ٹیسٹ میچوں میں بڑی شکستوں کے علاوہ بھارت کو ہوم سیریز میں پہلی بار نیوزی لینڈ سے بھی وائٹ واش شکست ہوئی تھی جب کہ کپتان کی ذاتی کارکردگی کا گراف بھی مسلسل گر رہا ہے اور آسٹریلیا کے خلاف تین ٹیسٹ میچز میں وہ کسی بھی اننگ میں 10 سے زائد اسکور نہیں کر سکے ہیں۔
ان شکستوں اور خراب کارکردگی کے باعث ان کے ٹیسٹ کرکٹ سے ریٹائرمنٹ کی خبریں بھی گردش کر رہی ہیں اور سابق کرکٹرز کی جانب سے بھی ایسے ہی مطالبات سامنے آ رہے ہیں۔
