بھارتی کسان نے ٹماٹروں پر نظر رکھنے۔ انھیں چوری سے بچانے کے لیے انوکھا اقدام کرتے ہوئے اپنے کھیت میں سی سی ٹی وی کیمرہ انسٹال کرلیا۔
غیرملکی میڈیا رپورٹس کے مطابق بھارت میں ان دنوں ٹماٹروں کو آگ لگی ہوئی ہے اور وہ اتنے مہنگے ہو گئے ہیں کہ عام آدمی اسے خریدتے ہوئے کئی بار سوچتا ہے، یہ لال سبزی بھارت میں 100 سے 200 روپے کلو میں فروخت ہورہی ہے۔
مذکورہ کسان کا کہنا تھا کہ اس نے ڈیجیٹل دور کے تقاضوں سے ہم آہنگ ہوتے ہوئے اپنے ٹماٹروں کی حفاظت کے لیے سی سی ٹی وی کیمرے نصب کیے ہیں، کسان کا کھیت ریاست ماہراشٹرا کے اورنگ آباد سے 20 کلو میٹر دور شاہ پور بنجر میں واقع ہے۔
کھیت سے ٹماٹر چوری ہونے کے بعد کسان یہ اقدام کرنے پر مجبور ہوا ہے، اس نے مقامی اخبار کو بتایا کہ وہ مزید ٹماٹروں کا نقصان برداشت نہیں کرسکتا اس لیے کیمرے نصب کیے۔
کسان کا کہنا تھا کہ 22 سے 25 کلو کا ٹماٹر کا کریٹ تین ہزار روپے میں فروخت ہورہا ہے، وہ ڈیڑھ ایکڑ پر ٹماٹروں کی کاشتکاری کرتا ہے اور یہ فصل آرام سے چھ سے سات لاکھ بھارتی روپے کے درمیان بنتی ہے۔
انھوں نے بتایا کہ کچھ دنوں قبل فارم سے 20 سے 25 کلو ٹماٹر چوری ہونے کے بعد کیمرے لگانے کا فیصلہ کیا ہے۔
