پرتاپ گڑھ : بھارتی گجرات کے ایک تھانے میں پولیس نے محض لائسنس نہ ہونے پر مسلمان نوجوان کو کرنٹ لگا کر بہیمانہ تشدد کا نشانہ بنایا، اہلکاروں کیخلاف مقدمہ درج کرلیا گیا۔
بھارتی میڈیا کے مطابق ریاست اترپردیش میں پرتاپ گڑھ ضلع کے تھانہ دیلہو پور پولیس نے چیکنگ کے دوران نوجوان پر بجلی کے جھٹکے لگا کر تشدد کیا۔
پولیس کے تشدد سے زخمی نوجوان کی حالت غیر ہوگئی تو اسے اسپتال لے جایا گیا جہاں اس کی حالت بدستور تشویشناک بتائی جارہی ہے۔
رپورٹ کے مطابق کرنٹ لگا کر تشدد کرنے کے الزام میں ڈی ایس پی رانی گنج کی ہدایت پر تھانہ میں تعینات ایک سب انسپکٹر سمیت تین پولیس اہلکاروں کے خلاف قاتلانہ حملہ سمیت دیگر سنگین دفعات کے تحت مقدمہ درج کرلیا گیا ہے۔
زخمی نوجوان محمد دانش کے بھائی محمد محسن کی جانب سے ڈی ایس پی کو دی جانے والی درخواست میں بتایا گیا کہ گزشتہ شام 6 بجے اس کا بھائی محمد دانش عرف کیف چھتپال گڑھ بازار سے گھر پریلا گاؤں بائیک سے واپس آرہا تھا کہ برسنڈہ پل کے نزدیک ایک سب انسپکٹر اور دو کانسٹیبل چیکنگ کررہے تھے۔
پولیس نے محمد محسن کے بھائی کو روک کر کاغذات طلب کیے تو بھائی نے کاغذات دکھاتے ہوئے کہا کہ اس کے پاس ڈرائیونگ لائسنس نہیں ہے جس پر پولیس اہلکار گالیاں دیتے ہوئے اسے تھانہ لے گئے جہاں بجلی کا کرنٹ لگاکر اس پر تشدد کیا گیا جس کے سبب اس کا بھائی شدید زخمی ہوگیا۔
