بھارت میں جنسی ہراسانی کے خلاف خواتین ریسلرز کی تحریک زور شور سے جاری ہے، رہنماؤں کا کہنا ہے کہ تحریک ختم کرنے کی تمام باتیں محض افواہیں ہیں۔
بھارتی میڈیا کے مطابق ریسلر ساکشی ملک نے وزیر داخلہ امت شاہ سے ملاقات کے بعد احتجاجی تحریک ختم کرنے کی تمام افواہوں کی تردید کی ہے۔
بی جے پی رکن پارلیمنٹ اور ریسلنگ ایسوسی ایشن کے صدر برج بھوشن شرن سنگھ کے خلاف محاذ کھولنے والی ساکشی ملک نے اپنے حالیہ ٹوئٹ میں احتجاجی تحریک سے دستبرداری کے اعلان کی خبروں کو افواہ قرار دے دیا۔
ساکشی ملک نے اپنے ٹویٹر پیغام میں واضح طور پر لکھا ہے کہ یہ خبر بالکل غلط ہے، انصاف کی جنگ میں ہم میں سے کوئی بھی پیچھے نہیں ہٹا ہے اور نہ ہی پیچھے ہٹیں گے۔ انصاف ملنے تک ہماری لڑائی جاری رہے گی۔ میڈیا سے اپیل ہے کہ براہ کرم کوئی غلط خبر نہ پھیلائیں۔
ساکشی ملک کے بعد بجرنگ پونیا نے بھی اپنے ٹوئٹر پیغام میں کہا ہے کہ تحریک واپس لینے کی خبریں محض افواہ ہیں۔ یہ خبریں ہمیں نقصان پہنچانے کے لیے پھیلائی جا رہی ہیں، ہم نہ پیچھے ہٹے ہیں اور نہ ہی تحریک واپس لی ہے۔ خواتین پہلوانوں کی ایف آئی آر درج کرنے کی خبر بھی جھوٹی ہے، انصاف کی فراہمی تک جدوجہد جاری رہے گی۔
یاد رہے کہ خواتین ریسلرز نے بھارتیہ جنتا پارٹی کے طاقتور سیاستدان اور فیڈریشن چیف برج بھوشن سنگھ کی جانب سے برسوں تک ہراساں کیے جانے کے خلاف اپریل میں احتجاج کا سلسلہ شروع کیا تھا۔
ان کا مطالبہ ہے کہ برج بھوشن سنگھ کو عہدے سے ہٹا کر ان کے خلاف قانونی کارروائی کی جائے جبکہ فیڈریشن چیف برج بھوشن کی جانب سے الزامات کی تردید کردی گئی تھی۔
