نیویارک: اقوام متحدہ کے انسانی حقوق کونسل کے سابق ہائی کمشنر زید راد الحسین نے مطالبہ کیا ہے کہ پاک بھارت کشیدگی کا سلامتی کونسل اور انسانی حقوق کونسل فوری نوٹس لیں۔
تفصیلات کے مطابق سماجی رابطے کی ویب سائٹ ٹوئٹر پر زید راد الحسین نے ٹوئٹ کیا کہ پاک بھارت بارود کے ڈھیر پر مقابلے کیلئے تیار بیٹھے ہیں۔
انہوں نے کہا کہ اس تنازع سے کچھ بھی خطے کیلئے انتہائی خطرناک ہوسکتا ہے، موجودہ بحران کی اصل وجہ انسانی حقوق کی سنگین صورت حال ہے۔
زید راد الحسین کا کہنا تھا کہ اقوام متحدہ کی گزشتہ سال کی رپورٹ میں واضح بتا دیا گیا تھا کہ حقیقت کیا ہے۔
خیال رہے کہ انسانی حقوق کونسل کی سال 2018 کی رپورٹ میں بھارتی مظالم بیان کیے گئے تھے، مقبوضہ کشمیر میں انسانی حقوق کی خلاف ورزیوں کی تحقیقات کا مطالبہ بھی کیا گیا تھا۔
انسانی حقوق کونسل کی رپورٹ میں انکوائری کمیشن تشکیل دینے کی سفارش کی گئی تھی۔
ہم نے مؤثر جواب دے دیا، توقع ہے بھارت ہوش مندی کا مظاہرہ کرے گا: آرمی چیف
یاد رہے کہ گذشتہ روز آرمی چیف جنرل قمر جاوید باجوہ کا کہنا تھا کہ توقع ہے بھارت ہوش مندی کا مظاہرہ کر کے وزیرِ اعظم کی دعوت کو مثبت لے گا، تاہم خدشہ ہے کہ بھارت پھر کوئی حرکت کر سکتا ہے۔
پاک فوج کے سربراہ جنرل قمر جاوید باجوہ نے پارلیمانی رہنماؤں کو ان کیمرہ بریفنگ دیتے ہوئے کہا کہ بھارت کوہم نے مؤثر جواب دے دیا ہے۔
