اسلام آباد: وزیر اعظم عمران خان نے کہا بالواسطہ ٹیکسز کابوجھ سب سے زیادہ غریب طبقات پر پڑتا ہے، بالواسطہ ٹیکسز کا بوجھ کم کرنے پر خصوصی توجہ دی جائے۔
تفصیلات کے مطابق وزیر اعظم عمران خان کی زیر صدارت حکومتی معاشی ٹیم کا اجلاس ہوا، اجلاس میں حفیظ شیخ، اسد عمر، خسرو بختیار،عبدالرزاق داؤد،عشرت حسین ، گورنراسٹیٹ بینک ،وقار مسعود، ندیم بابر، تابش گوہر اور سینئر افسران شریک ہوئے۔
اجلاس میں بنیادی اشیائے ضروری کی قیمتوں میں کمی اورعام آدمی کوریلیف فراہم کرنے اور مستحق خاندانوں کو ٹارگیٹڈسبسڈی کی فراہمی کے حوالے سے مختلف تجاویز پر غور کیا گیا۔
وزیراعظم نے کہا موجودہ حکومت کی اولین ترجیح عام آدمی کا مفاد ہے، مشکل معاشی حالات کی وجہ سےغریب عوام سب سےزیادہ متاثر ہیں، عوام کو ہر ممکنہ ریلیف فراہم کرنا حکومت کی اولین ترجیح ہے۔
عمران خان کا کہنا تھا کہ بالواسطہ ٹیکسز کابوجھ سب سے زیادہ غریب طبقات پر پڑتا ہے، بالواسطہ ٹیکسز کا بوجھ کم کرنے پر خصوصی توجہ دی جائے اور درآمد کھانے پینے کی اشیا پر ٹیکسز میں کمی کی تجاویز پیش کی جائیں۔
وزیراعظم نے ہدایت کی تجاویزدی جائیں تاکہ عوام خصوصاًغریب اور مڈل کلاس کوریلیف دیا جا سکے۔
