اسلام آباد: ملک میں مہنگائی کا زور ٹوٹ نہ سکا، ایک ہفتے میں 19 اشیائے ضروریہ مزید مہنگی ہو گئیں۔
تفصیلات کے مطابق ملک میں مہنگائی کا زور برقرار ہے، ادارہ شماریات سے جاری ہونے والی ہفتہ وار رپورٹ میں کہا گیا ہے کہ مہنگائی کی شرح 43.16 فی صد کی سطح پر برقرار ہے، جب کہ ایک ہفتے میں 19 اشیائے ضروریہ مہنگی ہوئیں۔
چینی 8 روپے 15 پیسے فی کلو مزید مہنگی ہوئی، دال چنا 5 روپے 98 پیسے، انڈے 8 روپے 3 پیسے فی درجن مہنگے ہوئے، دال مونگ 3 روپے 46 پیسے، اری چاول 2 روپے 49 پیسے فی کلو مہنگا ہوا۔
ایک ہفتے میں پیاز 1 روپے 68 پیسے، دال مسور 2 روپے 30 پیسے فی کلو مہنگی ہوئی، حالیہ ہفتے 20 کلو آٹے کا تھیلا 4 روپے 40 پیسے مزید مہنگا ہوا، نمک، ایل پی جی کا گھریلو سلنڈر، مٹن اور دال ماش بھی مہنگے ہوئے۔
ادارہ شماریات کے مطابق حالیہ ہفتے 10 اشیا کی قیمتوں میں کمی بھی ہوئی ہے، آلو 12 روپے 27 پیسے فی کلو، ٹماٹر 6 روپے 12 پیسے فی کلو، 190 گرام چائے کا پیکٹ 10 روپے 11 پیسے، چکن 4 روپے فی کلو، لہسن 1 روپے 96 پیسے، اڑھائی کلو گھی کاٹن، کیلے اور گڑ بھی سستا ہوا۔
حالیہ ہفتے 22 اشیائے ضروریہ کی قیمتوں میں استحکام رہا، جب کہ گزشتہ ایک ہفتے میں مہنگائی کی شرح میں 0.06 فی صد کمی ریکارڈ کی گئی۔
