پیرس : فرانس میں خون چوسنے والے کیڑوں کے حملے کے باعث خوف و ہراس پھیل گیا، مقامی انتظامیہ نے اسکول بند کرنے کے احکامات جاری کردیے۔
تفصیلات کے مطابق فرانس کے دارالحکومت پیرس میں کھٹملوں کی بڑی تعداد نے حملہ آور ہو کر شہریوں کو بے چین اور پریشان کردیا ہے جس کی وجہ سے ان کی راتوں نیندیں حرام ہوگئیں۔
بس اسٹاپ، ریلوے اسٹیشنز ، ہوٹلز، اسکول کالجز ، ریسٹورینٹس اور ہوائی اڈوں سمیت کوئی بھی مقام ایسا نہیں ہے جہاں ان لال کیڑوں کا بسیرا نہ ہو۔
فرانسیسی وزیر تعلیم گیبریل اٹل نے ان خون چوسنے والے کیڑوں کے پھیلاؤ سے نمٹنے کیلئے اسکول بند کروا دیئے۔ ان کا کہنا ہے کہ 15سے زائد تعلیمی اداروں میں کھٹملوں کی موجودگی کا پتہ چلا ہے۔
میڈیا سے گفتگو میں انہوں نے بتایا کہ تعلیمی اداروں میں کھٹمل پائے جانے پر پہلے مرحلے میں 7اسکولوں کو بند کرنا پڑا، مجموعی طور پر 17تعلیمی اداروں میں مختلف سطح پر کھٹمل پائے گئے ہیں۔
فرانسیسی وزیر تعلیم نے بتایا کہ ملک میں60ہزار تعلیمی ادارے ہیں یہ بھی سچ ہے کہ کھٹملوں کی موجودگی کی رپورٹس کا انبار لگا ہوا ہے۔
دوسری جانب فرانسیسی وزارت صحت کا کہنا ہے کہ فرانس کو برسوں سے کھٹملوں کے مسئلے کا سامنا ہے، پیرس کے ڈپٹی میئر کے مطابق ملک بھر میں بیڈبگ حقیقت میں ایک قومی ایمرجنسی ہے۔
ایک رپورٹ کے مطابق فرانس میں2017اور2022 کے درمیان10میں سے1گھر کھٹمل سے متاثر تھا، فرانس میں بڑے پیمانے پر ان خون چوسنے والے کیڑے کھٹمل کیخلاف آپریشن جاری ہے۔
یاد رہے کہ غیرملکی میڈیا کے مطابق فرانس میں موسم گرما کے اولمپک گیمز کا انعقاد کیا جانا ہے جو محض 9ماہ بعد شروع ہوگا۔
