سپریم کورٹ میں زمین کے تنازع کیس کی سماعت کے دوران چیف جسٹس قاضی فائز عیسی اور مقدمے کے وکیل کے درمیان دلچسپ مکالمہ ہوا۔
اے آر وائی نیوز کے مطابق چیف جسٹس آف پاکستان قاضی فائز عیسی نے زمین کے تنازع کیس کی سماعت کی۔ اس موقع پر وکیل اور چیف جسٹس کے درمیان دلچسپ مکالمے ہوئے اور عدالت میں قہقہے لگ گئے۔
چیف جسٹس قاضی فائز عیسیٰ نے وکیل سے کہا کہ پٹھان تو سب سے اچھے ہوتے ہیں۔ جتنا اخلاق آپ کو وہاں ملے گا ایسا کہیں اور نہیں لیکن پٹھانوں کا بس یہ ہے کہ وہ دشمنی بڑی لمبی چلاتے ہیں۔
جس پر وکیل نے کہا کہ لگتا ہے میں نے غلط جگہ پر ایسی بات کہہ دی۔ وکیل کے اس جملے پر عدالت میں قہقہے لگ گئے۔
اس موقع پر چیف جسٹس نے ساتھی ججز کی طرف دیکھتے ہوئے کہا کہ مجھے نہیں لگتا کہ بینچ میں اس معاملے پر اتفاق رائے ہو گا۔ ان کے اس جملے نے پھر کمرہ عدالت کو زعفران زار بنا دیا
چیف جسٹس نے مزید کہا کہ ہم نے شوقیہ مقدمہ بازی کو بند کرنا ہے۔
دوران سماعت جب وکیل نے کرائے کے معاہدے کا حوالہ آدھا اردو اور آدھا انگریزی زبان میں دیا تو چیف جسٹس نے انہیں ٹوکتے ہوئے کہا کہ آپ نے ابھی دو زبانوں کا قتل کیا ہے۔
چیف جسٹس قاضی فائز عیسیٰ نے کہا کہ آپ اپنا موقف اردو میں بتائیں یا مکمل انگریزی بولیں۔
