اسلام آباد : وزارت داخلہ نے کراچی کے بلدیاتی انتخابات میں حساس پولنگ اسٹیشنز پر ایف سی تعینات کرنے کی ہدایت کردی۔
تفصیلات کے مطابق کراچی اور حیدرآباد میں بلدیاتی انتخابات کے معاملے پر وزارت داخلہ نے حساس پولنگ اسٹیشنز پر ایف سی تعینات کرنے کی ہدایت کردی۔
وزارت داخلہ نے بتایا کہ الیکشن کمیشن نے فرنٹیئر کانسٹبلری کی اسٹیٹک تعیناتی کی درخواست کی تھی ، تعیناتی کی تاریخ اور علاقے پر مشاورت کی جائے گی۔
وزارت داخلہ کا کہنا تھا کہ سندھ حکومت الیکشن کمیشن ، فرنٹیر کانسٹیبلری سے مشاورت کریں گے ، ایف سی اہلکاروں کی پولنگ اسٹیشنز کے باہر اسٹیٹک تعیناتی کی جائے گی۔
الیکشن کمیشن نے 2 ہزار 3 سو سے زائد پولنگ اسٹیشنز کو حساس قرار دیا ہے۔
وزارت داخلہ نے بلدیاتی انتخابات میں فوج اور رینجرز اہلکاروں کی اسٹیٹک تعیناتی سے معذرت کی تھی اور سیکریٹری الیکشن کمیشن کووزارت داخلہ نے خط لکھ کر آگاہ کیا تھا۔
وزارت داخلہ نے کہا تھا کہ فوج اوررینجرزکی تعیناتی کامعاملہ جی ایچ کیوکےساتھ اٹھایا، اتنی بڑی تعدادمیں اسٹیٹک تعیناتی ممکن نہیں۔
خط میں کہا گیا تھا کہ الیکشن کمیشن 500 حساس پولنگ اسٹیشنزکی نشاندہی کرے، 500حساس پولنگ اسٹیشن کے باہر رینجرز کی اسٹیٹک تعیناتی کی جاسکتی ہے۔
