ایپل نے اپنی نئی اسمارٹ واچ میں صحت اور تندرستی کے حوالے سے حیرت انگیز فیچرز شامل کردئیے جن کی مدد سے گھڑی بلڈ پریشر کے ساتھ ساتھ صارف کے جسم کا درجہ حرارت بھی بتائے گی۔
مشہور امریکی ٹیکنالوجی کمپنی ایپل کی اسمارٹ واچ صحت سے متعلق معلومات تو پہلے بھی فراہم کرتی تھی لیکن کمپنی نے نئی اسمارٹ واچ سیون میں ایسا منفرد فیچر شامل کیا ہے جو صارف کی فزیکل فٹنس کا بھی خیال رکھتا ہے۔
کمپنی کی جانب سے نئی اسمارٹ واچ میں ایسے سینسرز شامل کیے گئے ہیں جو صارف کا بلڈ پریشر جانچنے کی صلاحیت رکھتا ہے اور جسم کا درجہ حرارت بھی نوٹ کرے گا۔
ایپل کی اسمارٹ واچ دل کی ڈھرکن تو پہلے بھی نوٹ کرتی تھی لیکن اب ان سینسرز کی مدد سے نئی گھڑی دھڑکن میں بے قاعدگی کی صورت میں الارم بجائے گی اور صارف کے ڈاکٹر کو ای میل پیغام کے ذریعے آگاہ کرے گی۔
غیر ملکی میڈیا کے مطابق آئی واچ سیون نیند کا دورانیہ بھی جانچ کر آپ کو بستر پرجانے کا وقت بتائے گی۔
نئی اسمارٹ واچ میں خون میں آکسیجن سطح اور شوگر کی مقدار ناپنے کی صلاحیت بھی ہوگی جو کمی کی صورت میں صارف کو آگاہ کرے گی۔
ماہرین کا کہنا ہے کہ آئی واچ سیون دنیا کے 436 ملین شوگر کے مریضوں کےلیے اُمید کی نئی کرن ثابت ہوسکتی ہے۔
