ایران نے سعودی عرب میں اپنا سفیر تعینات کر دیا ہے۔ نئے سفیر علی رضا عنایتی ریاض میں اپنی ذمہ داریاں سنبھالیں گے۔
بین الاقوامی میڈیا رپورٹس کے مطابق خارجہ امور کا وسیع تجربہ رکھنے والے علی رضا عنایتی کو سعودی عرب میں ایران کا نیا سفیر مقرر کیا گیا ہے۔
علی رضا عنایتی وزیرخارجہ کے اسسٹنٹ کے طور پر کام کر چکے ہیں اور خلیج میں خارجہ امور کا وسیع تجربہ رکھتے ہیں۔
وہ وزارت خارجہ میں عرب خلیج امور کے ڈائریکٹر جنرل کے عہدے پر بھی فائز رہے ہیں۔ اس کے علاوہ علی رضا عنایتی 2014 سے 2019 تک کویت میں ایران کے سفیر بھی رہ چکے ہیں۔
واضح رہے کہ سعودی عرب اور ایران نے 2016 کے بعد سفارتی تعلقات کی بحالی کا فیصلہ کیا جس کے بعد دونوں ممالک کے وزرائے خارجہ کی ملاقات بھی ہوچکی ہے جب کہ ایرانی صدر نے سعودی فرماں روا شاہ سلمان کی جانب سے دورہ سعودیہ کی دعوت بھی قبول کی ہے۔
سعودی عرب نے تہران میں اپنا نیا سفیر تعینات کر دیا ہے ایران میں سعودی عرب کا سفارت خانہ آئندہ چند روز میں کھل جائے گا۔
