نیو جرسی : امریکی صدر ڈونلڈ ٹرمپ نے کہا ہے کہ ایٹمی مذاکرات سے قبل دونوں ملکوں کے درمیان سیز فائر چاہتا ہوں، ایران سے بات کریں گے دیکھتے ہیں کیا ہوتا ہے۔
نیو جرسی میں میڈیا سے گفتگو کرتے ہوتے ہوئے ڈونلڈ ٹرمپ کا کہنا تھا کہ ایران اسرائیل صورتحال پر گہری نظر رکھی ہوئی ہے، ایران سے بات کریں گے دیکھتے ہیں کیا ہوتا ہے۔
میڈیا رپورٹ کے مطابق امریکی صدر نے کہا کہ ایران امریکا سے بات کرنا چاہتا ہے یورپ سے نہیں، میں مذاکرات سے پہلے سیز فائر چاہتا ہوں، میں عراق جنگ کے بھی خلاف تھا۔
کہا تھا اگر جنگ کرو تو تیل اپنے پاس رکھو مگر انہوں نے یہ نہیں کیا، ایک صحافی کی جانب سے کیے جانے والے سوال کہ انٹیلی جنس حکام نے کہا ہے کہ ایران جوہری ہتھیار نہیں بنا رہا اس پر آپ کی کیا رائے ہے؟
جس کے جواب میں ٹرمپ نے کہا کہ میرے انٹیلی جنس حکام غلط ہیں اگر ایسا کہتے ہیں، ڈائریکٹرانٹیلی جنس ایرانی ایٹمی ہتھیاروں سے متعلق غلط ہیں۔
امریکی صدر نے بتایا کہ ایران نے ایٹمی طاقت کیلئے تمام مٹیریل جمع کرلیا تھا۔ مجھےلگتا ہے کہ ایران ایٹمی طاقت بنانے کے قریب تھا، رکنا بہت مشکل ہوگا، اسرائیل کو ایران پر برتری حاصل ہے۔
رائٹرز کی رپورٹ کے مطابق جب ان سے پوچھا گیا کہ کیا وہ اس سے پہلے ایران پر حملے کا فیصلہ کر سکتے ہیں، تو ڈونلڈ ٹرمپ نے کہا کہ میں انہیں ایک مدت دے رہا ہوں ایران کے پاس ممکنہ امریکی حملوں سے بچنے کے لیے زیادہ سے زیادہ دو ہفتے کا وقت ہے۔
اپنی گفتگو میں ٹرمپ نے کہا کہ پاک بھارت جنگ رکوانے کیلئے مجھے نوبل پرائز ملنا چاہیے، روانڈا، کانگو، سربیا اور کوسوو کے لئے بھی مجھے نوبل پرائز دو، نوبل پرائز صرف لبرلز کو ملتا ہے یہ مجھے نہیں دیں گے۔
ایران پر حملوں سے متعلق ابھی کچھ نہیں کہہ سکتا، امریکی اثاثوں پر حملہ ہوا تو حملہ کرنے والوں کو بہت دکھ ہوگا۔ امریکی صدر کا مزید کہنا تھا کہ میں صورتحال دیکھ کر فیصلہ کروں گا، ایران میں زمینی فوج اتارنا آخری حل ہوگا۔
نیو جرسی کے شہر مورِسٹاؤن پہنچنے پرصحافیوں سے بات کرتے ہوئے ٹرمپ نے کہا کہ ایران یورپ سے بات نہیں کرنا چاہتا، وہ ہم سے بات کرنا چاہتے ہیں۔ یورپ اس مسئلے میں مدد نہیں دے سکے گا۔
