اسلام آباد : ایران کے وزیر خارجہ جواد ظریف 3 روزہ سرکاری دورے پر پاکستان پہنچ گئے، دوطرفہ تعلقات کے علاوہ علاقائی اور عالمی اُمور پر پاکستان کے سول اور عسکری عہدیداروں سے بات چیت کریں گے۔
تفصیلات کے مطابق ایرانی وزیر خارجہ جواد ظریف تیس رکنی وفد کے ہمراہ پاکستان پہنچ گئے ، وفد میں ایران کے کاروباری اور تجارتی شعبوں کے سر کردہ افراد شامل ہیں۔
اپنے دورہ پاکستا ن کے دوران جواد ظریف صدر پاکستان ممنون حسین ، وزیر اعظم شاہد خاقان عباسی اور دیگر اعلیٰ سول اور عسکری قیادت سے ملاقات کریں گے۔
ایرانی وزیر خارجہ اسلام آباد اور کراچی میں منعقد ہونے والے دو مختلف اجلاسوں سے بھی خطاب کریں گے، جس میں پاکستانی اورایرانی تجارتی برادری کے افراد شرکت کریں گے۔
جواد ظریف باہمی تعلقات کے موضوع پر پاکستانی تھنک ٹینک سے بھی خطاب کریں گے۔
خیال رہے کہ ایران پاکستان کا ایک قریبی ہمسایہ ملک ہے، جس کے ساتھ پاکستان کے تاریخی، سماجی اور مذہبی تعلقات ہونے کے باوجود باہمی تجارت کا حجم بہت کم ہے اور غیرجانبدار حلقوں کے نزدیک ا س کی وجہ ماضی میں ایران پر عائد تجارتی پابندیاں ہیں۔
