اسلام آباد: پاکستان پیپلزپارٹی کے چیئرمین بلاول بھٹو زرداری کا نام بھی ای سی ایل میں ڈالا جائے گا.
تفصیلات کے مطابق وزیر اطلاعات فواد چوہدری کی پریس کانفرنس کے بعد یہ سوال گردش کر رہا ہے کہ کیا بلاول بھٹو کا نام بھی ایگزٹ کنٹرول لسٹ میں شامل ہوگا؟
تجزیہ کاروں کا کہنا ہے کہ جے آئی ٹی رپورٹ میں بلاول بھٹو کا نام میگا کرپشن کے کرداروں میں شامل ہیں، پارک لین میں آصف زرداری، بلاول کے 50 فی صد بینیفشل شیئرز ہیں.
حکومت نے رپورٹ میں شامل 172 افراد کا نام ای سی ایل میں ڈالنے کا اعلان کیا ہے اور فیصلے کےتحت بلاول بھٹو کا نام بھی ایگزٹ کنٹرول لسٹ میں ڈالا جائے گا.
تجزیہ کاروں کے مطابق آصف زرداری، فریال تالپور کے ساتھ بلاول کانام بھی ای سی ایل میں ڈالا جائے گا.
یاد رہے کہ آج وفاقی وزیر اطلاعات نے اپنی پریس کانفرنس میں کہا تھا کہ جعلی اکاؤنٹس کیس میں مشترکہ تحقیقاتی ٹیم (جے آئی ٹی) کے نامزد 172 لوگوں کے نام ایگزٹ کنٹرول لسٹ میں ڈالے جائیں گے، جن میں سابق صدر آصف علی زرداری اور ان کی ہمشیرہ فریال تالپور کے نام بھی شامل ہیں.
مزید پڑھیں: حکومت کا آصف علی زرداری کا نام ای سی ایل میں ڈالنے کا فیصلہ
مزید پڑھیں: جمہوری طریقے سے الیکشن جیت کر ہم دوبارہ واپس آئیں گے، آصف زرداری
اس بیان پر پیپلزپارٹی کی جانب سے شدید ردعمل آیا اور فیصلے پر شدید تحفظات کا اظہار کیا گیا.
بعد ازاں آصف علی زرداری اور بلاول بھٹو نے لاڑکانہ میں شہید بے نظیر بھٹو کی برسی کے موقع پر جلسے سے خطاب کرتے ہوئے حکومت کو آڑے ہاتھوں لیا.
