جینوا: وزیر خزانہ اسحاق ڈار کی جنیوا کانفرنس کے دوران آئی ایم ایف وفد سے ملاقات کا امکان ہے ، جس میں درپیش مسائل پر بات چیت ہوسکتی ہے۔
تفصیلات کے مطابق وزیر خزانہ اسحاق ڈار آج جنیوا کانفرنس میں آئی ایم ایف وفد سے ملاقات کر یں گے، جس میں پاکستان کو درپیش مسائل پر بات چیت ہو سکتی ہے۔
ذرائع کا کہنا ہے کہ پاکستان کو درپیش مسائل پر بھی بات چیت ہو سکتی ہے، اسٹیٹ بینک کے زرمبادلہ کے ذخائرچار ارب پچاس کروڑڈالر کے رہ گئے ہیں، آئی ایم ایف کا پروگرام رُکا ہوا ہے اور ملک ڈیفالٹ کے قریب ہے۔
جنیوا میں منعقد ہونے والی رزیلینٹ کانفرنس میں پاکستان کے سیلاب زدہ علاقوں کی تعمیرنو اور بحالی کی حکمت عملی کا خاکہ پیش کیا جائے گام کانفرنس میں شامل ممالک سے پاکستان میں سیلاب کی تباہ کاریوں کے بعد بین الاقوامی حمایت لینا ہے۔
یاد رہے منیجنگ ڈائریکٹر انٹرنیشنل مانیٹری فنڈ کرسٹالینا جارجیوا نے وزیراعظم محمد شہباز شریف سے ٹیلی فونک رابطے میں حالیہ سیلاب سے ہونے والے جانی و مالی نقصانات پر گہری ہمدردی اور تشویش کا اظہار کرتے ہوئے اس مشکل وقت میں پاکستان کی امداد کرنے کے عزم کا اعادہ کیا تھا۔
وزیر اعظم نے ایم ڈی آئی ایم ایف کو یقین دلایا تھا کہ پاکستان آئی ایم ایف کے جاری پروگرام کو کامیابی کے ساتھ مکمل کرنے کے لیے پرعزم ہے اور پاکستان کو درپیش چیلنجز کو سمجھنے اور ہمدردی کے لیے ایم ڈی کا شکریہ ادا کیا تھا۔
