لندن : مسلم لیگ ن کے رہنما اسحاق ڈار کا کہنا ہے کہ نوازشریف کو واپسی کے لیے کسی گارنٹی یا یقین دہانی کی ضرورت نہیں، نوازشریف اکیس اکتوبرکو وطن واپس آرہے ہیں۔
تفصیلات کے مطابق مسلم لیگ ن کے رہنما اسحاق ڈار نے میڈیا سے گفتگو کرتے ہوئے کہا کہ نواز شریف کی واپسی کسی گارنٹی کا نتیجہ نہیں، واپسی کے سفر کیلئے کسی گارنٹی یایقین دہانی کی ضرورت نہیں۔
اسحاق ڈار کا کہنا تھا کہ نواز شریف 21 اکتوبر کو وطن واپس آرہے ہیں، ان کی واپسی پرضمانت کا عمل بھی ہو جائے گا، آج تک اس ملک میں کس کو حفاظتی ضمانت نہیں ملی، میں نے حفاظتی ضمانت لینے سے انکار کیا تھا۔
ن لیگی رہنما نے کہا کہ ڈالر کی اصل ویلیو 250 روپے ہے، ستمبر2022میں کہا تھا ڈالر ریٹ 200 سے کم ہونا چاہیے، اب ڈالر کو 250 روپے کے قریب آنا چاہئے کیونکی کوئی وجہ نہیں کہ ڈالر کی قیمت واپس اوپر جائے۔
ان کا کہنا تھا کہ انٹر بینک سسٹم اورایکسچینج کمپنیاں ذمہ داری کا مظاہرہ کر رہی ہیں، ہمارے دور میں بھی ڈالر اسمگلنگ اور ذخیرہ اندوزی کیخلاف ایکشن لیا گیا تھا۔
