اسلام آباد: کرونا وائرس لاک ڈاؤن کے باعث بند کیے جانے والے سینیٹ سیکریٹریٹ کو 6 اپریل سے کھولنے کا فیصلہ کرلیا گیا۔
تفصیلات کے مطابق چیئرمین سینیٹ صادق سنجرانی کی ہدایت پر 6 اپریل کو سینیٹ سیکریٹریٹ کھولنے کا فیصلہ کرلیا گیا، سینیٹ سیکریٹریٹ کا مختصر اسٹاف ڈیوٹی پر موجود رہے گا۔
ذرائع کا کہنا ہے کہ 50 سال سے زائد عمر کے افسران حاضری سے مستثنیٰ ہوں گے، پیر سے جمعرات صبح دس سے دو بجے تک ڈیوٹی اوقات رکھے گئے ہیں۔
ذرائع کے مطابق سینیٹ سیکریٹریٹ میں جمعہ کے روز صبح دس سے ایک بجے تک اوقات کار ہوں گے۔
واضح رہے کہ گزشتہ روز صدر مملککت ڈاکٹر عارف علوی سے چیئرمین سینیٹ صادق سنجرانی کی ملاقات ہوئی تھی جس میں کرونا وائرس سے متعلق اٹھائے گئے حکومتی اقدامات پر تبادلہ خیال کیا گیا تھا۔
صدر عارف علوی کا کہنا تھا کہ عوام حکومتی گائیڈ لائنز پر عمل کریں، گھروں میں بیٹھنے سے ہی وائرس سے بچا جاسکتا ہے۔
چیئرمین سینیٹ صادق سنجرانی کا کہنا تھا کہ وائرس سے بچاؤ کے لیے سماجی طور پر محدود رہنے سے ہی محفوظ رہا جاسکتا ہے، کرونا وائرس سے نمٹنے کے لیے چین کی تقلید کرنا ہوگی۔
