پی ٹی آئی چیئرمین عمران خان کی گزشتہ روز اسلام آباد ہائیکورٹ پیشی پر وکیل کی گرفتاری کے خلاف اسلام آباد بار کی جانب سے احتجاج کیا جا رہا ہے۔
اے آر وائی نیوز کے مطابق پاکستان تحریک انصاف کے چیئرمین اور سابق وزیراعظم عمران خان کے گزشتہ روز اسلام آباد ہائیکورٹ میں پیشی کے موقع پر پولیس کی جانب سے ایک وکیل کی گرفتاری کے خلاف اسلام آباد بار کی جانب سے آج ہڑتال کا اعلان اور احتجاج کیا جا رہا ہے جب کہ کوئی وکیل بھی آج عدالتوں میں پیش نہیں ہو رہا ہے۔
اسلام آباد بار نے احتجاجاً کچہری میں پولیس کا داخلہ بھی بند کرنے کا اعلان کر دیا ہے۔ بار نے ایس ایچ او تھانہ ترنول کی معطلی اور پولیس کے معافی مانگنے تک احتجاج جاری رکھنے کا اعلان کیا ہے۔
اس حوالے سے اسلام آباد بار کے سیکریٹری رائے اسد نوید بھٹی نے اعلامیہ جاری کیا ہے جس میں کہا گیا ہے کہ صدر بار چوہدری قیصر امام ایڈووکیٹ کی سربراہی میں ہونے والے اجلاس میں کل کے واقعے کے خلاف احتجاج کا فیصلہ کیا گیا۔
اعلامیے میں مزید کہا گیا کہ وکلا کی عزت اور کالے کوٹ کے تقدس کو اپنا فرض سمجھتے ہیں اور بار رکن سید علی اصغر ایڈووکیٹ کی گرفتاری کی مذمت کرتے ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں