اسلام آباد پولیس نے بچوں کو گرفتار کرنے کے حوالے سے چیئرمین پی ٹی آئی کے بیان کو جھوٹا قرار دیتے ہوئے کہا ہے کہ شہری کسی پروپیگنڈے کا حصہ نہ بنیںِ۔
تفصیلات کے مطابق اسلام آباد پولیس نے چیئرمین پی ٹی آئی کا بچوں کو گرفتار کرنے کا بیان جھوٹ قرار دے دیا۔
اس حوالے سے ترجمان پولیس کا کہنا ہے کہ ملزمان عامر مغل اور اس کے بیٹوں کے خلاف تھانہ ترنول میں مقدمہ درج ہے۔
ترجمان اسلام آباد پولیس نے کہا ہے کہ پولیس نے صرف عامر مغل کے بیٹوں سعد عبداللہ، حسن عبداللہ کو گرفتار کیا تھا، کسی بچے کو گرفتار نہیں کیا اور نہ ہی توڑ پھوڑ کی گئی۔
اسلام آباد پولیس کے مطابق چیئرمین پی ٹی آئی کا بیان حقائق کے بالکل برعکس،عوام کو اشتعال دلانے اور اداروں کے خلاف اکسانے کے مترادف ہے۔
ترجمان نے شہریوں سے اپیل کی ہے وہ ایسے پراپیگنڈے کا ہرگز حصہ نہ بنیں، اسلام آباد کیپیٹل پولیس قانون کے مطابق اپنے فرائض سرانجام دے رہی ہے۔