اسلام آباد کے اسکول میں گرمی اور لوڈشیڈنگ کی وجہ سے متعدد بچے بیہوش ہوگئے۔
اے آر وائی نیوز کے مطابق اسلام آباد کے اسکول میں ہیٹ ویو سے متعدد بچوں کی حالت غیر ہوگئی، گرمی کی شدت میں بھی سرکاری اور پرائیویٹ اسکول کھلے ہیں۔
پنجاب اور دیگر صوبوں میں چھٹیوں کے نوٹیفکیشن جاری ہوچکے ہیں۔
واضح رہے کہ محکمہ موسمیات بھی گرمی کی شدت میں اضافے کا الرٹ جاری کرچکا ہے۔
محکمہ موسمیات کا کہنا ہے کہ رواں ہفتے ملک کے بیشتر علاقے شدید گرمی کی لہر کی لپیٹ میں رہیں گے، اسلام آباد اور گرد و نواح میں موسم شدید گرم اور خشک رہے گا۔
محکمہ موسمیات کے مطابق پنجاب کے بیشتر اضلاع میں موسم شدیدگرم رہے گا، جبکہ مری، گلیات اور گرد و نواح میں موسم گرم اور خشک رہے گا۔ مری، گلیات میں درجہ حرارت 4 سے 8 ڈگری سینٹی گریڈ زیادہ رہنے کا امکان ہے۔
بلوچستان کے بیشتراضلاع میں موسم شدید گرم رہے گا، بلوچستان میں درجہ حرارت معمول سے 4 سے 6 ڈگری سینٹی گریڈ زیادہ رہنے کاامکان ہے۔
سندھ کے بیشتراضلاع میں موسم شدیدگرم،ساحلی علاقوں میں گرم اور مرطوب رہے گا، درجہ حرارت معمول سے 6 سے 8 ڈگری سینٹی گریڈ زیادہ رہنے کا امکان ہے۔
