امیر جماعت اسلامی حافظ نعیم الرحمان نے کہا ہے کہ اسماعیل ہنیہ کے صاحبزادے سے ملاقات کی حوصلہ بلند تھا، کوئی بھی ان چٹانوں سے نہیں ٹکرا سکتا۔
تفصیلات کے مطابق امیر جماعت اسلامی حافظ نعیم کا کہنا تھا کہ فلسطینی رہنماؤں سے ملاقات کی ان کے حوصلے بلند تھے، اسماعیل ہنیہ کی شہادت سے امت میں نیا جذبہ پیدا ہوگیا ہے، فلسطینیوں کے حوصلے پہاڑوں کی طرح مضبوط ہیں، نیتن یاہو یا کوئی اور ہو ان چٹانوں سے ٹکرا نہیں سکتا۔
حافظ نعیم الرحمان نے کہا کہ حق کے راستے میں قربانی کا میابی کی ضمانت ہوتی ہے، 7 اکتوبر کو طوفان الاقصیٰ نے اسرائیل کو شکست دے دی تھی، القسام بریگیڈ نے اسرائیل کی انٹیلی جنس کو فیل کرکے رکھ دیا۔
انھوں نے کہا کہ پاکستانی قوم اور امت مسلمہ کی جانب سے فلسطین کے ساتھ یکجہتی کا اظہار کرتے ہیں، پاکستان کے بانی نے کہا تھا کہ اسرائیل کو کبھی تسلیم نہیں کریں گے۔
حافظ نعیم الرحمان نے کہا کہ پاکستان کے وزیرخارجہ اور سفیر تک اسماعیل ہنیہ کی نماز جنازہ میں نظر نہیں آئے، پاکستان کے وزیراعظم کو اسماعیل ہنیہ کی نمازجنازہ میں شرکت کرنی چاہیے تھی۔
انھوں نے کہا کہ حکومت نے عوامی دباؤ میں اسرائیل کی مذمت کی ہے، حکمران اقتدار کے تحفظ کیلئے امریکا اور اسرائیل کے خلاف بات نہیں کرتے۔
