آئی ایس پی آر نے شمالی وزیرستان میر علی واقعہ سے متعلق سیکیورٹی فورسز پر الزامات کو بے بنیاد قرار دے دیا ہے۔
آئی ایس پی آر کی جانب سے جاری بیان میں شمالی وزیرستان میر علی واقعے سے متعلق سیکیورٹی فورسز پر الزامات بے بنیاد قرار دیتے ہوئے کہا ہے کہ 19 مئی کے واقعہ پر غلط اور گمراہ کن پروپیگنڈہ جاری ہے۔
آئی ایس پی آر کا کہنا ہے کہ پاکستان کی فورسز پر الزامات بدنیتی پر مبنی مہم کا حصہ ہیں۔ میر علی واقعے کی فوری اور جامع تحقیقات شروع کی گئیں۔ ابتدائی تحقیقات کے مطابق حملہ بھارتی حمایت یافتہ فتنہ الخوارج نے کیا۔
بیان میں کہا گیا ہے کہ بھارتی سر پرستی میں کام کرنے والے دہشتگرد شہریوں کو ڈھال بناتے ہیں جب کہ فتنہ الخوارج مقامی آبادی اور فورسز میں غلط فہمیاں پھیلانا چاہتے ہیں۔
آئی ایس پی آر کا کہنا ہے کہ سیکیورٹی فورسز دہشت گردی کے خاتمے کیلیے پُر عزم ہیں اور ذمہ داروں کو انصاف کے کٹہرے میں لایا جائے گا۔
