بیروت: اسرائیلی فوج نے لبنان کے سرحدی علاقے پر گولاباری شروع کر دی ہے۔
روئٹرز کے مطابق حزب اللہ کی جانب سے متنازع شیبہ فارمز میں 3 اسرائیلی فوجی ٹھکانوں کو نشانہ بنانے کے بعد اسرائیل نے اتوار کو جنوبی لبنان میں توپ خانے سے گولہ باری کی۔
اسرائیل نے دعویٰ کیا ہے کہ لبنان سے ہونے والی گولہ باری میں اسرائیل کی فوجی چوکی کو نشانہ بنایا گیا، اور لبنان کی سرحد پار سے مارٹر گولے فائر ہونے کے بعد ان اہداف کو نشانہ بنایا گیا ہے۔
ترک میڈیا انادولو کے مطابق اسرائیلی فوجیوں نے لبنان کی شمالی سرحد پر حزب اللہ کے جھنڈے اٹھائے ہوئے مظاہرین پر فائرنگ کی، موٹر سائیکل سواروں کا ایک گروپ سرحدی علاقے میں حماس کے اسرائیل پر حملے کا جشن منانے آیا تھا، زخمیوں سے متعلق کوئی اطلاع موصول نہیں ہو سکی ہے۔
غزہ اندھیروں میں ڈوب گیا، اسرائیل کا تمام سپلائی معطل کرنے کا اعلان
روئٹرز کے مطابق ایران کی حمایت یافتہ طاقت ور مسلح گروپ حزب اللہ نے کہا ہے کہ اس نے فلسطینی عوام کے ساتھ ’’یکجہتی‘‘ کے طور پر شیبہ فارمز میں تین پوسٹوں پر گائیڈڈ راکٹ داغے، اسرائیلی فوج کا کہنا ہے کہ درجنوں جنگجو لبنان سے اسرائیل میں داخل ہو گئے ہیں۔
واضح رہے کہ اسرائیل نے 15 مربع میل (39 مربع کلومیٹر) پر مشتمل شیبا فارمز پر 1967 سے قبضہ کر رکھا ہے، شام اور لبنان دونوں کا دعویٰ ہے کہ شیبا فارمز لبنانی ہیں۔
آپریشن طوفان الاقصیٰ جاری، ہلاک اسرائیلیوں کی تعداد 530 سے تجاوز کر گئی
ادھر جنوبی لبنان میں اقوام متحدہ کے امن مشن نے اسرائیل اور غزہ میں ہونے والی پیش رفت کے بعد اپنی موجودگی کو بڑھا دیا ہے، تاکہ یہاں سے ہونے والے راکٹ حملوں کی کارروائیوں کو روکا جا سکے۔
