اسلام آباد : شہری سعیدہ بیگم نے زائد بجلی بل اور مخصوص طبقے کو مفت بجلی کیخلاف درخواست دائرکر دی، جس میں کہا گیا کہ بجلی بلوں پر ٹیکس کالعدم قرار دیتے ہوئے آئی پی پیزسے ریکوری کی جائے۔
تفصیلات کے مطابق بجلی کے زائد بلز اور مفت یونٹس کی فراہمی کا معاملہ سپریم کورٹ تک پہنچ گیا ، شہری سعیدہ بیگم نے زائد بجلی بل اور مخصوص طبقےکومفت بجلی کیخلاف درخواست دائرکر دی۔
درخواست میں مؤقف اختیار کیا گیا کہ سابقہ حکومت نے آئی پی پی بورڈز کو بجلی پرٹیکس سے استثنیٰ دیا، بجلی کے محکمےمیں کام کرنے والے بھی تنخواہ لیتے ہیں۔
درخواست گزار کا کہنا تھا کہ عوام کی سہولت کیلئے بجلی کے بنائے گئے سلیب بحال کیے جائیں، آئین شہریوں کو یکساں سہولتوں کی فراہمی یقینی بناتا ہے۔
دائر درخواست میں بتایا گیا کہ درخواست گزار کو بجلی کا 54 ہزارسے زائد کا بل آیا، وسائل کے باوجوددرخواست گزار بجلی کا بل ادا کرنےسے قاصر ہے۔
درخواست میں استدعا کی گئی کہ تمام محکموں کے افسران کومفت یونٹس کی فراہمی فوری روکنےکا حکم دیا جائے اور عدلیہ ،ارکان کو بھی مفت بجلی ،پٹرول کی سہولت کالعدم قرار دی جائے۔
درخواست گزار نے یہ بھی استدعا کی کہ بجلی بلوں پر ٹیکس کالعدم قرار دیتے ہوئے آئی پی پیزسے ریکوری کی جائے۔