اسلام آباد : تعلیمی اداروں میں طلبا کو باہنر بنانے کے لئے اہم فیصلہ کرلیا گیا، پہلے مرحلے میں تقریبا 1ہزار طلبا کیلئے کورسز پیش کئے جائیں گے۔
تفصیلات کے مطابق وفاقی دارالحکومت میں خصوصی سرمایہ کاری سہولت کونسل کے تعاون سے 16 جدید ترین آئی ٹی لیبز کے قیام کا فیصلہ کرلیا گیا۔
وفاقی وزارت تعلیم و پیشہ ورانہ تربیت نے خصوصی سرمایہ کاری سہولت کونسل کے تعاون سے وفاقی دارالحکومت کے تعلیمی اداروں میں جدید ترین لیبز قائم کرنے کا فیصلہ کیا ہے۔
ان جدید ترین لیبز میں نوجوانوں کو جدید ترین ہنرسکھائے جائیں گے، جس سے ان کے لئے روزگار کے مواقع میں اضافہ ہوگا۔
وزارت تعلیم کی جانب سے جاری اعلامیے کے مطابق یہ لیبز اسلام آباد کے مختلف علاقوں میں واقع 16 ڈگری کالجز میں تعمیر کی جائیں گی۔
ان لیبز میں طلبہ کو بلاک چین، ڈیٹا سائنس، مصنوعی ذہانت اور گیم ڈویلپمنٹ میں 6 ماہ کے کورسز کرائے جائیں گے۔
پہلے مرحلے میں تقریبا 1ہزار طلبا کو کورسز پیش کئے جائیں گے جو مارکیٹ کی طلب کو مدنظر رکھتے ہوئے متعارف کرائے جا رہے ہیں۔
ان کورسز کو نیشنل ووکیشنل اینڈ ٹیکنیکل ٹریننگ کمیشن نے نسٹ، نیشنل ا سکلز یونیورسٹی، کامسیٹس اور نمل جیسی معروف یونیورسٹیوں کے تعاون سے تیار کیا ہے
یہ کورسز مئی2024 کے دوسرے ہفتے میں شروع ہوں گے، وزارت تعلیم نے مزید بتایاکہ اب تک ان کورسز کیلئے 3ہزار 6سو طلبا اندراج کراچکے ہیں۔
وزیر اعظم پاکستان کی ہدایت پر وزارت وفاقی تعلیم کی جانب سے یہ لیبز تیار کرنے کا فیصلہ کیا گیا ہے۔
یہاں یہ بات قابل ذکر ہے کہ نوجوانوں کو روزگار کے مواقع فراہم کرنا بھی خصوصی سرمایہ کاری سہولت کونسل کے ایجنڈے میں شامل ہے۔
