اسلام آباد: نگراں وزیر آئی ٹی و ٹیلی کمیونیکیشن ڈاکٹر عمر سیف عام لوگوں تک اسمارٹ فونز پہنچانے کیلئے اقدامات کررہے ہیں۔
تفصیلات کے مطابق نگراں وزیر آئی ٹی و ٹیلی کمیونیکیشن ڈاکٹر عمر سیف نے کہا ہے کہ سیلولر آپریٹرز، سرمایہ کارکمپنیاں، بینک قسطوں پر اسمارٹ فونز کے پیکیجز کا اعلان کریں، عوام کو سہولیات کی فراہمی اولین ترجیح ہے۔
انہوں نے کہا کہڈیفالٹرز کے فون بلاک کئے جائیں گے، نادہندگان کیلئے اس سے اگلا قدم سم اور قومی شناختی کارڈ بلاکنگ ہوسکتا ہے، اس اقدام سے نادہنگان کی حوصلہ شکنی اور اسمارٹ فونز کے استعمال کا تناسب بڑھے گا۔
ڈاکٹر عمر سیف کا کہنا تھا کہ طلب میں اضافے سے موبائل فونز مینوفیکچررز انڈسٹری اور ملکی معیشت کو فائدہ پہنچے گا، دیہی علاقوں میں فون، سیلولر آپریٹرز کیلئے بزنس کیسز بھی بنیں گے۔
نگراں وزیر آئی ٹی ڈاکٹر عمر سیف نے مزید کہا کہ ای کامرس کے فروغ کیلئے اسمارٹ فونز فار آل پالیسی ضروری ہے، روانڈا کو اسمارٹ فونز ایکسپورٹ کرنے سے متعلق اہم پیشرفت ہوئی ہے، پاکستانی اسمارٹ فونز میں روانڈا حکومت نے خصوصی دلچسپی ظاہر کی ہے۔
