جیکب آباد: اے آر وائی نیوز کی خبر پر ایکشن لیتے ہوئے سیشن کورٹ جیکب آباد نے ڈسٹرکٹ فوڈ کنٹرولر کو طلب کرلیاہے۔
تفصیلات کے مطابق گذشتہ روز اے آر وائی نیوز نے صوبہ سندھ کے ضلع جیکب آباد کی خبر نشر کی تھی جس میں ڈسٹرکٹ فوڈ کنٹرولرجیکب آباد کی سرپرستی میں سرکاری گندم میں مٹی ملائی جارہی تھی۔
محکمہ خوراک کی جانب سے جیکب آباد کے گودام میں چھاپہ مارا گیا تھا جہاں فوڈ سپروائزرغلام مصطفی گندم میں مٹی ملاتے ہوئےرنگے ہاتھوں پکڑا گیا تھا۔
رپورٹ کے مطابق گندم میں بڑی مقدار میں مٹی ملانے کی تصدیق ہوئی تھی جبکہ واقعے کے ویڈیو شواہد بھی موجود ہیں،واقعے میں ملوث فوڈ سپر وائزرغلام مصطفی انڑ کو سرکاری گندم میں مٹی ملانے کے الزام میں معطل کیا جاچکا ہے۔
تاہم اب جیکب آباد کی مقامی عدالت نے اے آر وائی نیوز کی خبر پر ایکشن لیتے ہوئے ڈسٹرکٹ فوڈ کنٹرولر کوطلب کرلیاہے، سیشن کورٹ نے حکم دیا ہے کہ فوڈ کنٹرولر جیکب آباد خادم شر 29 مئی کو عدالت کے روبرو پیش ہوں۔
ڈی جی فوڈ سندھ سید امداد شاہ نے اے آر وائی نیوز کو بتایا کہ متعلقہ کیس میں ڈپٹی ڈائریکٹرفوڈ لاڑکانہ کو انکوائری افسر مقرر کیا گیا ہے رپورٹ کے بعد پر فوڈ سپروائزرغلام مصطفی انڑ کیخلاف مزید کارروائی ہوگی۔
