لاہور : پاکستان تحریک انصاف کی جیل بھرو تحریک کی تیاریاں زور و شور سے جاری ہیں، جس کیلئے کارکنان میں بھرپور جوش وجذبہ پایاجا رہا ہے۔
جیل بھرو تحریک میں اب تک پی ٹی آئی کے ہزاروں کارکنان نے رجسٹریشن کروالی ہے اور رجسٹریشن کا سلسلہ تاحال جاری ہے۔ اس حوالے سے ذرائع کا کہنا ہے کہ مختلف اضلاع کے15ہزار سے زائد کارکنوں نے خود کو رضاکارانہ طور پر رجسٹرڈ کروا لیا ہے۔
یاد رہے کہ پی ٹی آئی کی جیل بھرو تحریک کا آغاز22فروری کو لاہور سے ہوگا، پہلے مرحلے میں سابق گورنرعمر سرفراز چیمہ اور سینیٹر ولید اقبال اپنی گرفتاری دیں گے۔
ذرائع کے مطابق سابق صوبائی وزیر مراد راس، محمد خان مدنی اور فواد رسول بھلر بھی گرفتاری دینگے اس کے علاوہ پی ٹی آئی کے200 کارکنان بھی رہنماؤں کے ہمراہ گرفتاری دیں گے۔ اس موقع پر پی ٹی آئی کے ہزاروں ورکرز وہاں موجود ہوں گے۔
مزید پڑھیں : عمران خان کا بدھ سے ‘جیل بھرو تحریک’ شروع کرنے کا اعلان
واضح رہے کہ چیئرمین پی ٹی آئی عمران خان نے گزشتہ روز اپنے خطاب میں 22فروری بروز بدھ سے ملک بھر میں جیل بھرو تحریک شروع کرنے کا اعلان کیا تھا۔
مزید پڑھیں : جیل بھرو تحریک کیلئے ویڈیو پیغام جاری
زمان پارک سے ویڈیو لنک کے ذریعے خطاب کرتے ہوئے سابق وزیراعظم کا کہنا تھا کہ کارکنان تیاری کرلیں،جیل بھرو تحریک کو لاہور سے شروع کیا جائے گا اور ہرگزرتے دن کے ساتھ دیگر بڑے شہروں کی جیلیں بھریں گے۔
