فیصل آباد: پنجاب کے شہر فیصل آباد میں خواتین نے کٹی پتنگ کے لیے ناقابل یقین حد تک جیمز بانڈ ایکشن کا مظاہرہ کر کے لوگوں کو حیران کر دیا۔
تفصیلات کے مطابق فیصل آباد کے علاقے مدن پورہ میں پتنگ باز خواتین نے کٹی پتنگ کے لیے اپنے ایکشن سے دیکھنے والوں کو حیران کر دیا، رسی کی مدد سے چھت سے لڑکی کے اترنے اور چڑھنے کی ویڈیو سوشل میڈیا پر وائرل ہو گئی۔
فوٹیج کے مطابق مدن پورہ کے ایک گھر کی چھت پر کچھ خواتین پتنگ بازی میں مصروف تھیں کہ ایک پتنگ کٹ کر نیچے گلی میں گری، خواتین نے پتنگ اٹھانے کے لیے ایک لڑکی کو رسی کے ذریعے نیچے گلی میں اتارا۔
فوٹیج میں لڑکی کو چھت سے کٹی پتنگ اٹھاتے دیکھا جا سکتا ہے، جب کہ چھت پر موجود 4 خواتین رسی لٹکاتے ہوئے بھی دیکھی جا سکتی ہیں، چھت پر موجود خواتین نے لڑکی کو رسی کے سہارے پہلے نیچے اتارا اور اوپر کھینچا۔ ویڈیو میں منڈیر کے قریب خواتین کو خطرناک انداز میں لڑکی کو تھامتے دیکھا جا سکتا ہے۔ ایکشن مکمل ہونے پر قریبی چھتوں پر موجود منچلوں نے تالیاں بجا کر پاکستانی جیمز بانڈ خواتین کو داد دی۔
دوسری طرف وزیر اعلیٰ پنجاب عثمان بزدار نے فیصل آباد میں پتنگ بازی کا سخت نوٹس لیتے ہوئے کمشنر اور آر پی او کو کارروائی کا حکم دے دیا ہے، عثمان بزدار نے کہا کہ پابندی کے باوجود پتنگ بازی کے واقعات ناقابل برداشت ہیں، جہاں بھی غفلت ہوئی کارروائی عمل میں لائی جائے۔
دریں اثنا، فیصل آباد میں پتنگ بازوں کے خلاف کریک ڈاؤن میں 275 پتنگ بازوں اور دکان داروں کو گرفتار کر لیا گیا ہے، ملزمان سے 7820 پتنگیں، 1500 چرخی کیمیکل ڈور برآمد ہوئی، پولیس کا کہنا ہے کہ ملزمان کے خلاف مختلف تھانوں میں 243 مقدمات درج کر لیے گئے ہیں۔
خیال رہے کہ گزشتہ روز پنڈی کرکٹ اسٹیڈیم میں بھی پاک بنگلا دیش ٹیسٹ میچ کے دوران ایک کٹی پتنگ اڑتی ہوئی آ گری تھی۔
