کیو: جیمز بانڈ کی فلم سیریز ‘کوانٹم آف سولس’ کی ہیروئن خوبرو اداکارہ اولگا کریلنکو نے کورونا وائرس کو مات دے دی، اداکارہ کا کورونا ٹیسٹ مثبت آیا تو انھوں نے خود کو آئیسولیٹ کرلیا تھا۔
تفصیلات کے مطابق دو ہزار آٹھ مں ڈینئل کریگ کے ساتھ ’’کونٹم آف سولس‘‘ میں بانڈ گرل کا کردار ادا کرنے والی اولگا کریلنکو نے کورونا وائرس کو شکست دے دی ہے، یہ اعلان انھوں نے سماجی رابطے کی ویب سائٹ ٹوئٹر پر کیا۔
اولگا نے مہلک ترین وائرس کوویڈ 19 میں مبتلا ہونے سے متعلق اعلان انسٹاگرام پر کیا تھا اور کہا تھا کہ کرونا وائرس ٹیسٹ کی رپورٹ مثبت آنے کے بعد میں نے خود کو گھر میں (قرنطینہ) محصور کرلیا ہے’۔
اولگا نے بتایا تھا کہ ‘میں گزشتہ ایک ہفتے سے بیمار تھی اور مجھ میں وائرس کی علامات بخار اور تھکن بھی ظاہر ہورہی تھی جس کے باعث میں نے ٹیسٹ کروانے کا فیصلہ کیا جو مثبت آیا’۔
خیال رہے کہ 40 سالہ اداکارہ اولگا کوریلینکو 2008 میں ریلیز ہونے والے جیمز بانڈ فلم کی سیریز کوانٹم سولس میں اپنے فن کا مظاہرہ کرچکی ہیں اس کے علاوہ انہوں نے میجک سٹی اور کئی ترکش ڈراموں اور فلموں میں بھی کام کیا ہے۔
واضح رہے چین سے شروع ہونے والی وبا نے ساری دنیا کو اپنی گرفت میں لےلیا ہے، ہلاکت خیز وائرس دنیا بھر میں ہزاروں لوگوں کی جان لے چکا ہے، جہاں وائرس نے عام شہریوں اور سیاست دانوں کو متاثر کیا وہیں وائرس نے ہالی ووڈ فلم انڈسٹری کی نامور شخصیات کو بھی متاثر کرنا شروع کردیا ہے۔
