"باتیں کچھ ادبی’ کچھ بے ادبی کی” جمیل یوسف کے تنقیدی مضامین اور شخصی خاکوں کا مجموعہ ہے جس میں انھوں نے ممتاز مزاح گو شاعر سید ضمیر جعفری کا خاکہ تحریر کرتے ہوئے ایک دل چسپ واقعہ بھی لکھا ہے۔
جمیل یوسف لکھتے ہیں کہ وہ (ضمیر جعفری) کسی کی دل آزاری کے کبھی مرتکب نہ ہوئے، تحریر نہ تقریر سے۔ وہ کوئی بات ایسی کبھی نہ کرتے جس سے کسی کو کوئی دکھ پہنچے۔ ایک واقعہ بیان کرتے ہیں کہ جب ان کے بیٹے جنرل احتشام ضمیر کالج میں پڑھتے تھے تو ان کو سگریٹ نوشی کی لت پڑ گئی۔ گھر میں سگریٹ سلگانے کا تو خیر سوال ہی نہ تھا مگر ضمیر جعفری کو کسی طرح پتا چل گیا۔ ایک صبح کالج جانے کے لیے جب احتشام گھر سے نکلنے لگے تو جعفری صاحب نے گولڈ لیف کی ایک ڈبیا جو وہ غالباً ایوان صدر سے لائے ہوں گے کہ اس پر پریزیڈنٹ ہاؤس لکھا ہوا تھا، ان کی طرف بڑھا دی کہ یہ لو۔
صاحبزادے نے حیرت کا اظہار کرتے ہوئے کہا، ابو! سگریٹ کی ڈبیا کا میں کیا کروں گا؟ ضمیر جعفری صاحب مسکراتے ہوئے کہنے لگے، پرنسپل کو دے دینا۔”
