The news is by your side.

Advertisement

جان محمد جمالی کراچی کے نجی اسپتال منتقل

کراچی: اسپیکر بلوچستان اسمبلی جان محمد جمالی کراچی کے نجی اسپتال منتقل کیے گئے ہیں۔

تفصیلات کے مطابق دو دن قبل بلا مقابلہ اسپیکر بلوچستان منتخب ہونے والے بی اے پی رہنما جان محمد جمالی کو طبیعت خراب ہونے پر کراچی کے ایک نجی اسپتال منتقل کیا گیا ہے۔

اسپیکر منتخب ہونے کے باوجود جان جمالی تاحال حلف نہیں اٹھا سکے ہیں، ان کے اہل خانہ کا کہنا ہے کہ وہ نمونیا کا شکار ہو گئے تھے، جس پر انھیں علاج کے لیے کراچی لایا گیا ہے۔

ذرائع اہل خانہ کے مطابق جان محمد جمالی کا علاج شہر قائد کے ایک نجی اسپتال میں کیا جا رہا ہے، یہ بھی معلوم ہوا ہے کہ انھیں ایمرجنسی میں طبی امداد دی گئی ہے۔

تاہم اہل خانہ کا کہنا ہے کہ جان جمالی کی حالت خطرے سے باہر ہے، ان سے ملاقات پر پابندی ہے، اسپتال انتظامیہ کا کہنا ہے کہ صرف اہل خانہ کو ملاقات کی اجازت ہے۔

یاد رہے کہ 30 اکتوبر کو میر جان محمد جمالی بلا مقابلہ اسپیکر بلوچستان اسمبلی منتخب ہوئے ہیں، تاہم طبیعت کی ناسازی کے باعث وہ حلف نہ اٹھا سکے تھے۔

اسپیکر بلوچستان اسمبلی کی خالی نشست کے لیے بلوچستان عوامی پارٹی (بی اے پی) نے سینئر رہنما اور رکن صوبائی اسمبلی میر جان محمد جمالی کو نامزد کیا تھا۔

جان محمد جمالی صوبے کے سینئر سیاست دانوں میں سے ایک ہیں، وہ 1998 میں وزیر اعلیٰ بلوچستان بھی رہے، 2006 میں ڈپٹی چیئرمین سینیٹ کے فرائض بھی انجام دے چکے ہیں، وہ اس سے قبل 2013 میں بھی اسپیکر بلوچستان اسمبلی کے عہدے پر خدمات انجام دے چکے ہیں۔

اسپیکر بلوچستان کی نشست عبدالقدوس بزنجو کے استعفے کے بعد خالی ہوئی ہے، عبدالقدوس بزنجو نے گزشتہ روز وزیر اعلیٰ بلوچستان کے منصب کا حلف اٹھایا۔

Comments

یہ بھی پڑھیں