سکھر : صحافی جان محمد مہر کے قاتلوں کے اہم سہولت کار سمیت مزید 3 ملزمان کو کچے سے گرفتارکرلیا گیا، ایس ایس پی سکھر کا کہنا ہے کہ جان محمد مہر کے قاتلوں کے قریب پہنچ چکے ہیں۔
تفصیلات کے مطابق صحافی جان محمد مہر قتل کیس میں اہم پیشرفت ہوئی ، کچے میں آپریشن کے دوران قاتلوں کے اہم سہولت کار سمیت مزید 3 ملزمان
کو گرفتار کرلیا گیا۔
ایس ایس پی سکھر عرفان علی سموں نے کہا کہ قاتلوں کی سہولت کاری میں ملوث مزید3ملزمان گرفتار کرلیے اور جان محمد مہرکےقاتلوں کےقریب پہنچ چکے ہیں۔
عرفان علی سموں کا کہنا تھا کہ قاتلوں کی گرفتاری کیلئے کچے میں دوسرے روز بھی آپریشن جاری ہے، کچے سے شہر آمدورفت کے راستوں اور دریا میں چلنے والی کشتیوں کو بند کر دیا گیا ہے اور ڈرون کیمروں کی مددسے ملزمان کےٹھکانوں کی نشاندہی کی جارہی ہے۔
گذشتہ روز سکھر میں صحافی جان محمد مہر قتل کیس میں چار مشتبہ افراد کو گرفتار کرکے تفتیش شروع کردی گئی تھی ، پولیس کا کہنا تھا کہ صحافی جان محمد کے قاتلوں کو جلد گرفتار کرلیا جائے گا۔
یاد رہے گذشتہ ماہ کے آخر میں محکمہ داخلہ سندھ نے جان محمد مہرقتل کیس کی تحقیقات سی ٹی ڈی سکھر کے ڈی ایس پی عبدالقدوس کلوڑ کے سپرد کر دی تھی۔
وزیرداخلہ سندھ کا کہنا تھا کہ جان محمد مہر کے بہیمانہ قتل کے ملزمان کی گرفتاری کیلئے تحقیقات تیز کی جائیں جان محمد مہر کے لواحقین کو فوری طور پر فول پروف سکیورٹی فراہم کی جائے۔
