جاپان کے چاولوں کی برآمدات ریکارڈ بلند سطح پر پہنچ گئی، رواں سال جنوری سے جولائی کی مدت میں 24 ہزار ٹن سے زائد چاول بیرون ملک بھیجا گیا۔
بیرون ملک جاپانی ریستورانوں کے کھانوں کی مانگ ہے جس کی وجہ سے اس سال ابتدائی 7 ماہ میں جاپان کی چاولوں کی برآمدات میں ریکارڈ اضافہ ہوا، جاپانی وزارت زراعت نے منگل کو بتایا کہ جاپان نے اس مدت کے دوران 24 ہزار 469 ٹن چاول بیرون ملک برآمد کیا۔
پچھلے سال کے مقابلے میں جاپانی چاولوں کی برآمدات میں 23 فیصد اضافہ دیکھنے میں آیا ہے، 2014 سے ایسے اعداد و شمار جمع کیے جانے کے بعد چاولوں کی برآمدات اس مدت کے دوران ریکارڈ سطح پر پہنچی۔
سب سے زیادہ چاول ہانگ کانگ کو برآمد کیا جاتا ہے، اس کے بعد جاپان امریکا اور سنگاپور کو بالترتیب زیادہ چاول برآمد کرتا ہے۔
جاپانی وزارت زاعت نے کہا کہ ایشیا کے مختلف ممالک اور امریکا میں جاپانی ریستورانوں میں چاولوں کی بڑھتی ہوئی مانگ کے سبب برآمدات میں اضافہ ہوا۔
اندرون ملک سپر مارکیٹوں اور اسٹوروں پر چاولوں کی سپلائی ڈیمانڈ کے مقابلے میں بدستور کم ہے، حالیہ زلزلوں اور طوفانوں کی وجہ سے کچھ لوگوں نے چاولوں کی معمول سے زیادہ خریداری کی۔
جاپانی وزیر ساکاموتو تیتسُوشی نے بتایا کہ جاپان میں چاول کا کمرشل اسٹاک جون کے آخر میں 15 لاکھ 60 ہزار ٹن تھا، جو گزشتہ سال چاولوں کی سالانہ برآمد 37 ہزار ٹن سے کہیں زیادہ ہے۔
